Joriy yilning 1-yanvaridan 31-yanvarigacha bo‘lgan davrda banklar tomonidan berilgan kreditlar hajmi o‘tgan yilning shu davriga nisbatan 21,8 foizga oshdi. Bu haqda “Daryo”ga Iqtisodiy tadqiqotlar va islohotlar markazi xabar bermoqda.
Kreditlar berish hajmi Toshkent (102,3 foiz), Sirdaryo (73,5 foiz), Xorazm (71,4 foiz), Farg‘ona (44,6 foiz) viloyatlarida, Qoraqalpog‘iston Respublikasi (17,8 foiz) va Toshkent shahrida (32,7 foiz) sezilarli darajada oshgani qayd etildi.
Tahlil qilinayotgan davrda O‘zbekiston Respublikasi tovar-xomashyo birjasida amalga oshirilgan bitimlar hajmi 32,1 foizga o‘sdi.
Birja faoliyatining sezilarli o‘sishi Qashqadaryo (93,2 foiz), Sirdaryo (86,2 foiz), Samarqand (67 foiz), Xorazm (62,8 foiz) viloyatlarida Qoraqalpog‘iston Respublikasida (68,2 foiz) va Toshkent (28,5 foiz) shahrida kuzatildi.
Ushbu hududlarda tuzilgan bitimlar hajmining o‘sishi suyultirilgan gaz, mineral o‘g‘itlar, texnik chigit, avtomobil benzini, dizel yoqilg‘isi, qurilish va xo‘jalik materiallari, o‘simlik yog‘i, bug‘doy uni, bug‘doy, shakar, paxta tolasi, qora va rangli metallar, polietilen va boshqa mahsulotlar savdosining ko‘payishi hisobidan erishilgan.
Tahlil qilinayotgan davrda 6 046 ta yangi xo‘jalik yurituvchi subyektlar tashkil etilib, ularning eng ko‘pi Farg‘ona (553), Toshkent (513), Samarqand (469), Xorazm (453), Buxoro (402) viloyatlarida va Toshkent shahrida (1 362) ro‘yxatga olingan.
Izoh (0)