Молия вазирлиги 2022 йил учун давлат бюджети даромадлари якуний кўрсаткичини эълон қилди.
Давлат бюджети даромадлари 2022 йилда 202 трлн сўм бўлиб, 2021 йилга нисбатан 37,2 трлн сўмга ёки 22,6 фоизга ошди.
Ўтган йили Давлат бюджети даромадларининг ЯИМдаги улуши 22,7 фоизни ташкил этиб, бу кўрсаткич 2021 йилга нисбатан солиштирилганда 0,3 фоизга ва 2020 йилга нисбатан 0,6 фоизга ошди.
Ҳисобот йилида Давлат бюджети таркибидаги Солиқ қўмитаси маъмурчилигидаги тушумлар 148,4 трлн сўмни (жами Давлат бюджети даромадларига нисбатан 73,4 фоиз), Божхона қўмитаси бўйича тушумлар 46 трлн сўмни (22,8 фоиз) ҳамда бошқа даромадлар ва солиқ бўлмаган тушумлар 7,6 трлн сўмни (3,8 фоиз) ташкил қилди. Бунда ҚҚС бўйича қоплаб бериш (19,3 трлн сўм) ва фуқароларга харид суммасидан 1 фоиз кешбэк қайтариш (0,8 трлн сўм) ҳисобга олинган.
Солиқ қўмитаси бўйича белгиланган прогноз 6 трлн сўмга ёки 4,2 фоизга ортиғи билан бажарилди. Тушумлар 2021 йилга нисбатан 20,4 трлн сўмга ёки 16 фоизга, 2020 йилга нисбатан эса 44,8 трлн сўмга ёки 43,3 фоизга ошди.
Шу билан бирга, божхона қўмитаси бўйича белгиланган прогноз 4,9 млрд сўм ёки 11,9 фоизга ортиғи билан бажарилди.
Тушумлар 2021 йилга нисбатан 12,8 трлн сўм ёки 38,5 фоизга, 2020 йилга нисбатан эса 21,3 трлн сўм ёки 86,3 фоизга ошди.
2021 йилга нисбатан бевосита солиқлар, ресурс тўловлари ҳамда мол-мулк солиғининг Давлат бюджети даромадларидаги улуши камайган бўлса, билвосита солиқлар ҳамда бошқа даромадлар ва солиқ бўлмаган тушумларнинг улуши ошди.
Йирик солиқ тўловчилар бўйича ҳудудлараро солиқ инспекцияси бўйича 2022 йилда тушумлар 88,3 трлн сўмни ташкил этиб, 2021 йилга нисбатан 6 трлн сўмга ёки 7,3 фоизга ошди.
Изоҳ (0)