Osiyo taraqqiyot banki (OTB) O‘zbekistonda iqtisodiy boshqaruvni yaxshilash uchun 150 mln dollar miqdorida qarz va 400 ming dollar miqdorida grant ajratilishini ma’qulladi. Bu haqda bank matbuot xizmati xabar bermoqda.
OTBning Iqtisodiy boshqaruvni yaxshilash dasturining 2-fazasi birinchi kichik dasturi davlat sektori boshqaruvi islohotlaridagi OTBning oldingi ko‘magini davom ettiradi va chuqurlashtiradi.
Dastur doirasida O‘zbekistonga moliyaviy boshqaruvning samaradorligi va shaffofligini oshirish, davlat korxonalari boshqaruvi va faoliyatini takomillashtirishda ko‘mak berilmoqda.
Shu jumladan, raqobatni rag‘batlantirish va ishonchli korrupsiyaga qarshi kurash va audit tizimlari yordamida davlat sektori hisobdorligini oshirish maqsadida huquqiy, tartibga solish va institutsional bazani isloh qilishda ham yordam berilmoqda.
“O‘zbekiston yanada ochiq va raqobatbardosh bozor iqtisodiyotiga o‘tishga yordam beradigan islohotlarga qat’iy sodiqligini namoyish etdi, — deydi OTBning Markaziy va G‘arbiy Osiyo bo‘yicha bosh direktori Yevgeniy Jukov.
Uning ta’kidlashicha, OTB mamlakatga makroiqtisodiy barqarorlikni, inklyuziv va barqaror o‘sishni ta’minlagan holda ushbu maqsadga erishishda yordam berishda davom etadi.
Bundan tashqari, dastur O‘zbekistonning “yashil” iqtisodiyotga o‘tish strategiyasini ishlab chiqish va amalga oshirishni qo‘llab-quvvatlaydi.
Aniq milliy reja O‘zbekistonga Parij kelishuvi bo‘yicha o‘z majburiyatlarini bajarishga, infratuzilmani modernizatsiya qilishga va ishchi kuchini “yashil” ish o‘rinlari uchun zarur bo‘lgan ko‘nikmalarga o‘rgatishga yordam beradi.
“Davlat sektori investitsiyalari uchun fiskal maydon yaratish, davlat xizmatlarini ko‘rsatish sifatini oshirish va O‘zbekistonda xususiy sektorni rivojlantirish uchun qulay muhit yaratish uchun davlat korxonalarining moliyaviy shaffofligini oshirish, korporativ va professional boshqaruvini takomillashtirish va monopoliyaga qarshi kurash tizimlarini mustahkamlash muhim ahamiyat kasb etadi”, — dedi OTBning Davlat boshqaruvi bo‘yicha bosh iqtisodchisi Chidem Akin.
400 ming dollar miqdoridagi texnik ko‘mak granti islohotlarni amalga oshirishga yordam beradi.
O‘zbekiston OTBga 1995-yilda a’zo bo‘lgan. O‘shandan beri OTB mamlakatga 10,8 mlrd dollar miqdorida qarz, grant va texnik ko‘mak taqdim etgan.
OTB 1966-yilda tashkil etilgan bo‘lib, unga 68 mamlakat a’zo bo‘lgan. Ularning 49 tasi mintaqada joylashgan.
Izoh (0)