Angren pipe plant kompaniyasi ustav kapitalidagi 100 foiz davlat ulushini sotish bo‘yicha kelishuvga erishildi. Bu haqda Davlat aktivlarini boshqarish agentligi xabar bermoqda.
Ma’lum bo‘lishicha, Angren truba zavodini Natural Juice va Gross kompaniyalari konsorsiumiga sotish bo‘yicha kelishuvga erishilgan. Kelishuv qiymati 19,2 mln dollar yoki 217,5 mlrd so‘m bo‘lgan.
Zavodni xususiylashtirish jarayoni 2022-yilning avgustida boshlangan edi.
Angrent truba zavodini sotib olayotgan Gross sug‘urta kompaniyasi 2011-yildan boshlab faoliyat yuritib kelmoqda.
Gross O‘zbekiston bo‘yicha 80 dan ortiq filiallarga ega, ixtiyoriy va majburiy shakllardagi barcha 17 sug‘urta toifalari bo‘yicha 100 dan ortiq turdagi sug‘urta mahsulotlarini taqdim etmoqda.
Angren Pipe plant — O‘zbekistonda turli diametrli mis quvurlar ishlab chiqaruvchi korxona bo‘lib, quvvati yiliga 8 000 tonnani tashkil etadi.
Asosiy xomashyo Markaziy Osiyo mintaqasidagi eng yirik tog‘-kon va qayta ishlash korxonalaridan biri bo‘lgan “Olmaliq KMK” tomonidan asosiy metall tarkibi 99,99 foiz bo‘lgan katodli mis yetkazib beriladi.
Kompaniyaning markaziy ofisi Toshkent viloyati, Angren shahar, Ohangaron ko‘chasida joylashgan. Korxona 2013-yildan tijorat faoliyatini boshlagan.
Izoh (0)