Ангрен труба заводи 217,5 млрд сўмга хусусийлаштирилди

Angren Pipe plant компанияси устав капиталидаги 100 фоиз давлат улушини сотиш бўйича келишувга эришилди. Бу ҳақда Давлат активларини бошқариш агентлиги хабар бермоқда. 

Маълум бўлишича, Ангрен труба заводини Natural Juice ва Gross компаниялари консорсиумига сотиш бўйича келишувга эришилган. Келишув қиймати 19,2 млн доллар ёки 217,5 млрд сўм бўлган. 

Заводни хусусийлаштириш жараёни 2022 йилнинг августида бошланган эди. 

Ангрент труба заводини сотиб олаётган Gross суғурта компанияси 2011 йилдан бошлаб фаолият юритиб келмоқда. 

Gross Ўзбекистон бўйича 80 дан ортиқ филиалларга эга, ихтиёрий ва мажбурий шакллардаги барча 17 суғурта тоифалари бўйича 100 дан ортиқ турдаги суғурта маҳсулотларини тақдим этмоқда.

Angren Pipe plant — Ўзбекистонда турли диаметрли мис қувурлар ишлаб чиқарувчи корхона бўлиб, қуввати йилига 8 000 тоннани ташкил этади. 

Асосий хом ашё Марказий Осиё минтақасидаги энг йирик тоғ-кон ва қайта ишлаш корхоналаридан бири бўлган “Олмалиқ КМК” томонидан асосий металл таркиби 99,99 фоиз бўлган катодли мис етказиб берилади. 

Компаниянинг марказий офиси Тошкент вилояти, Ангрен шаҳар, Оҳангарон кўчасида жойлашган. Корхона 2013 йилдан тижорат фаолиятини бошлаган.