Shveysariya rossiyaliklar mulkini musodara qilishni noqonuniy deb e’lon qildi

Shveysariya hukumati rossiyaliklarning mol-mulkini musodara qilish va ularni Ukrainani qayta tiklashga yo‘naltirishni noqonuniy deb e’lon qildi. Bu haqda mamlakat Adliya vazirligi boshchiligidagi ishchi guruh xulosalarida qayd etilgan. 

Ishchi guruh bu masalani uzoq vaqt o‘rganib chiqdi va rossiyaliklarning muzlatilgan aktivlarini musodara qilish yo‘llarini qidirdi, ammo qonuniy yo‘l topa olmadi, deyiladi bayonotida.

Shveysariya Federal Adliya boshqarmasi (FOJ) boshchiligidagi ishchi guruhi Rossiyaning xususiy mulklarini musodara qilish Federal Konstitutsiya va amaldagi huquqiy tartibni buzadi, degan xulosaga keldi. 

Bayonotda mulk huquqi asosiy huquq ekanligi ta’kidlangan. Muzlatilgan xususiy aktivlarni musodara qilish Shveysariyaning xalqaro majburiyatlarini buzadi. 

Muzlatilgan Rossiya aktivlari bo‘yicha muhokamalardan mustaqil ravishda Federal Kengash Ukrainani qo‘llab-quvvatlashni davom ettirish niyatida ekanligini yana bir bor tasdiqladi.

Rossiya va Ukraina o‘rtasida urush boshlangandan beri ko‘plab rossiyalik milliarderlarning mulklari musodara qilingan edi.