Andijondagi bojxonada iste’molga yaroqsiz konfetlar, “Orbit”, alkogol va tamaki mahsulotlari to‘xtatib qolindi

Andijon viloyatida sifatsiz oziq-ovqat mahsulotlari iste’molining oldi olindi, deb xabar beradi Majburiy ijro byurosi Andijon viloyati boshqarmasi.

Qayd etilishicha, fuqaro N.A. “Do‘stlik” chegara posti kirish yo‘lagi orqali Qirg‘izistondan umumiy qiymati 1 564 000 so‘mlik 390 dona “Spriti df Coca-cola”, 2280 dona “Mamp.M” nomli, 3240 dona xitoy yozuvli konfetlarni, fuqaro R.D. 26 766 000 so‘mlik 7290 dona “Orbit” nomli saqichlarni, fuqaro N.I. 70 quti “Big blast” nomli qandli aromat saqichlarni noqonuniy olib o‘tayotgani aniqlangan. Sudning tegishli qarorlariga asosan ular ma’muriy javobgarlikka tortilgan. Shuningdek, mahsulotlarning yo‘q qilinishi belgilangan.

Bundan tashqari, 100 kilogramm “Panko” nomli non suxariklari, 242 dona qabartma, 30 kilogramm Xitoy yong‘oqlari, 15 dona alkogol va 30 quti tamaki hamda qariyb 2 000 kilogramm bayram mahsulotlari ham yo‘q qilinishi sud hujjatlarida ko‘rsatib o‘tilgan.

Sud hujjatlarining ijrosini ta’minlash maqsadida byuroning Xo‘jaobod tuman bo‘limi tomonidan yuqorida nomlari keltirilgan noqonuniy olib o‘tilgan mahsulotlar tegishli tartibda yo‘q qilinib, iste’molchilar salomatligiga ziyon yetkazishi oldi olingan.