Шавкат Мирзиёев 17 февраль куни Бухоро шаҳридаги Мир Араб мадрасасига ташрифи пайтида эндиликда кам таъминланганларга Умрага боришда ёрдам берилишини маълум қилди.
Президент мадраса талабалари билан учрашув давомида сўнгги йилларда Умра ва Ҳаж сафарларига қатнов сони кўпайтирилганини таъкидлади. “Умрага хоҳлаганча рухсат бериляпти. Ҳаж сафарлари карра-карра кўпайди. Эътиқод инсоннинг юрагида, бағрида, кўнглида бўлади”, — дейди президент.
Шундан кейин давлат раҳбари муфтий ва талабаларга юзланиб, кимда қандай таклиф бўлса, эшитишга тайёр эканини айтди. Нуриддин Холиқназаров Умрага боришга имконияти етмайдиган кам таъминланганлар учун давлат томонидан ёрдам берилишини сўради.
“Сиздан битта илтимос бўлади, адолатли танлов қилиб берсангиз, хоҳлаганингизча ёрдам бераман. Ҳақиқий кам таъминланганлар истаги, албатта, ижобат бўлади. Уларнинг рўйхатини шакллантириб беринг. Керак бўлса, у ердаги раҳбарларга ҳам айтиб, уларни алоҳида-алоҳида кутиб оладиган қилиб ташкиллаштирамиз”, — дея жавоб қайтарди президент.
Изоҳ (0)