Shavkat Mirziyoyev Buxoro shahridagi Mir Arab oliy madrasasini borib ko‘rdi. Bu haqda prezident matbuot xizmati xabar berdi.
Ta’kidlanishicha, davlat rahbari 2017-yilda bu yerga kelib, ahvolni ko‘rgan, madrasaning tarixiy mavqeyini tiklashni maqsad qilgandi. Buning uchun Ark yaqinida yangi bino barpo etildi va yaqinda foydalanishga topshirilgan.
Oliy madrasa 200 o‘ringa mo‘ljallangan. Bu yerda Qur’oni karim, hadis, fiqh va tasavvuf ilmlari, xorijiy tillar puxta o‘rgatiladi. Bugungi kunda jami 107 nafar talaba ta’lim olmoqda. O‘quv xonalari, kutubxona, faollar zali, talabalar yotoqxonasi va xizmat uyi, sportzal va basseynda barcha qulayliklar yaratilgan. Davlat rahbari madrasa talabalari bilan suhbatlashdi.
“Bunday uzoq tarixga ega ta’lim dargohlari juda kam. Bugun uning sharoitini yaxshilab, tarixiy adolatni tiklaganimiz xayrli ish bo‘ldi, deb o‘ylayman. Demokratik islohotlarimiz natijasida diniy sohaga ham erkinlik epkini kirib keldi. Shu bilan birga, axborot makoni ham ochiq. Internetda ilmiy asosi bo‘lmagan turli talqinlar ham bor. Lekin ularni tajribasiz yoshlar qayerdan biladi? Buni sizga o‘xshagan ilmli kishilar, imom-xatiblarimiz isbotlab, to‘g‘ri tushuntirib berishi kerak”, — dedi Shavkat Mirziyoyev.
Uchrashuvda diniy ta’lim soatlari va sifatini isloh qilish, uni amaliyot bilan bog‘lash bo‘yicha fikrlar bildirildi. Shu bilan prezidentning Buxoro viloyatiga tashrifi yakunlandi, davlat rahbari Toshkentga jo‘nab ketdi.
Izoh (0)