Sirdaryo va Namanganda soxta “valyutchik”lar 6500 dollarni so‘mga ayirboshlayotganda qo‘lga tushdi

Sirdaryo va Namangan viloyatlarida valyuta qimmatliklari noqonuniy muomalaga kiritilishining oldi olindi, deb xabar bermoqda Iqtisodiy jinoyatlarga qarshi kurashish departamenti.

Qayd etilishicha, Bosh prokuratura huzuridagi departamentning Shirin shahar bo‘limi tomonidan tezkor tadbir o‘tkazilgan. Unda valyuta ayirboshlash bilan shug‘ullanib kelgan M.E. va N.X.  jami 3 500 dollarni fuqaro J.R.ga 40,3 million so‘mga sotgan vaqtlarida qo‘lga tushgan. Tadbir yakunida jami 4 550 dollar ashyoviy dalil sifatida olingan.

Shuningdek, departamentning Namangan shahar bo‘limi tomonidan tezkor tadbir o‘tkazilgan. Unda “Ozod” MFY hududida valyuta ayirboshlash bilan shug‘ullanib kelgan B.M. jami 3 000 dollarni fuqaro A.T.ga 34,1 million so‘mga sotgan vaqtida ashyoviy dalillar bilan ushlangan.

Holatlar yuzasidan Jinoyat kodeksining 177-moddasi (valyuta qimmatliklarini qonunga xilof ravishda olish yoki o‘tkazish) bilan jinoyat ishlari qo‘zg‘atilgan. Hozirda tergov harakatlari o‘tkazilmoqda.