Toshkentda ommaviy yugurish musobaqasi o‘tkazilishi munosabati bilan bir qator ko‘chalar yopiladi

Toshkent shahridagi bir qator ko‘chalar 19-fevral kuni 2 yarim soatga harakat uchun yopiladi. Bu haqda shahar hokimligi xabar qildi.

Qayd etilishicha, “Men g‘olib” ommaviy yugurish musobaqasi o‘tkazilishi munosabati bilan shu kuni soat 07:00 dan soat 09:30 gacha quyidagi hududlarda avtomobillarning harakatlanishiga vaqtinchalik cheklovlar o‘rnatiladi:

• Xalqlar do‘stligi san’at saroyi oldi maydonidan Furqat ko‘chasi bo‘ylab Beshyog‘och ko‘chasi kesishgan joyigacha;
• Beshyog‘och ko‘chasi bo‘ylab Islom Karimov ko‘chasi bilan kesishgan joyigacha; 
• Islom Karimov ko‘chasi bo‘ylab Amir Temur shohko‘chasi bilan kesishgan joyigacha;
• Amir Temur shohko‘chasi bo‘ylab Amir Temur xiyoboni aylanma yo‘li bo‘ylab Islom Karimov ko‘chasi bilan kesishgan joyigacha, 
• Islom Karimov ko‘chasi bo‘ylab Xalqlar do‘stligi san’at saroyi oldi maydonigacha bo‘lgan ko‘chalar.

“Haydovchilarga aylanma yo‘llardan foydalanishni tavsiya etamiz va yuzaga kelgan noqulaylik uchun uzr so‘raymiz”, — deyiladi xabarda.