O‘zbekistonda 15-fevral kuni 2,6 mlrd so‘m yoki 30 mingta xonadonning bir oylik isteʼmoliga teng hajmdagi elektr energiyasidan noqonuniy foydalanish holatlari aniqlandi. Bu haqda Energetika vazirligi axborot xizmati xabar berdi.
Xabarga ko‘ra, 15-fevral kuni Energetika vazirligi huzuridagi “O‘zenergoinspeksiya” va huquqni muhofaza qiluvchi organlar bilan hamkorlikda o‘tkazilgan nazorat tadbirlarida 119 ta holatda 6,3 mln kVt soat miqdoridagi (jami 2,6 mlrd so‘m) elektr energiyasidan noqonuniy foydalanish holatlari aniqlandi.
Qayd etilishicha, ushbu hajmdagi elektr energiyasi o‘rtacha 30 mingta xonadonning bir oylik isteʼmolini tashkil qiladi. Misol uchun:
- Namangan shahrida joylashgan “Istiqilol Javohiri” MCHJ elektr tarmog‘iga o‘zboshimchalik bilan ulanishi natijasida 646 million so‘m;
- Qo‘shrabot tumanida joylashgan “Zamin Sirojxon” fermer xo‘jaligi elektr tarmog‘iga o‘zboshimchalik bilan ulanishi natijasida 275 million so‘m;
- Bo‘stonliq tumanida “Sardor-Sarvar-Akmal Stroy” MCHJ elektr tarmog‘iga noqonuniy ulanishi orqali 187 million so‘m qayta hisob-kitob amalga oshirildi.
Elektr energiyasidan noqonuniy foydalangan isteʼmolchilarning elektr qurilmalari tarmoqdan ajratilib, holat bo‘yicha rasmiylashtirilgan hujjatlar huquqni muhofaza qiluvchi organlarga yuborilayotgani taʼkidlandi. Hududlarda nazorat tadbirlari davom ettirilmoqda.
Prezident qarori bilan yoqilg‘i-energiya resurslaridan oqilona va samarali foydalanishni taʼminlash va bu boradagi jarayonlarni raqamlashtirish maqsadida 2023-yil 1-martdan boshlab “O‘zenergoinspeksiya”ga “Hududiy elektr tarmoqlari” AJ, “Hududgaztaʼminot” AJ, “O‘zbekiston milliy elektr tarmoqlari” AJ, “O‘ztransgaz” AJlarning elektr energiyasi va tabiiy gazni nazorat qilish hamda hisobga olishning avtomatlashtirilgan tizimlaridagi yoqilg‘i-energiya resurslari isteʼmoli to‘g‘risidagi maʼlumotlarni monitoring qilish imkoniyati yaratilishi aytilgan edi. “O‘zenergoinspeksiya” “Hududiy elektr tarmoqlari” AJ, “Hududgaztaʼminot” AJ, “O‘zbekiston milliy elektr tarmoqlari” AJ, “O‘ztransgaz” AJ bilan birgalikda har oyda elektr va gaz tarmoqlari hamda qurilmalarining yuklamalari va sozligini tekshirib borib, aniqlangan kamchiliklarni bartaraf etish choralarini ko‘radi.
Shuningdek, “O‘zenergoinspeksiya” 2023-yil 1-mayga qadar yoqilg‘i-energiya resurslaridan noqonuniy va samarasiz foydalanish holatlarini aniqlash hamda ularni onlayn rasmiylashtirish uchun barcha xodimlarni maxsus planshetlar bilan taʼminlanishi xabar qilingan. Bundan tashqari, mavjud elektr va gaz tarmoqlari hamda qurilmalarining yuklamasi belgilangan meʼyordan oshgan taqdirda, ularga yangi isteʼmolchilarni ulash qatʼiyan taqiqlangandi.
Izoh (0)