DXX Samarqand viloyati boshqarmasi hamda viloyat IIB xodimlari hamkorligida o‘tkazilgan tezkor tadbirda viloyat hududida radioaktiv va zaharli qurilmalarni sotish bilan shug‘ullanib kelayotgan shaxslar qo‘lga olindi, deb xabar bermoqda Zarnews.
Andijon viloyatida tug‘ilgan, muqaddam Jinoyat kodeksining bir necha moddalari bilan sudlangan fuqaro M.S., sherigi R.S., Samarqand shahrida yashovchi fuqaro J.O. o‘zaro til biriktirgan holda jinoiy guruh tuzib, mo‘may daromad topishni rejalashtirgan.
Ma’lum bo‘lishicha, fuqaro R.S. jinoiy sherigi M.S.ning taklifiga ko‘ra, Andijon viloyatidagi tanishidan, go‘yoki harbiy maqsadda foydalaniladigan radioaktiv va zaharli qurilmalarni Samarqand shahriga olib kelib, ishonchli xaridor topilguniga qadar Samarqand shahridagi mehmonxonalardan birida yashab kelgan.
Keyinchalik, M.S. Samarqand shahridagi tanishi J.O. orqali mazkur moslamalarni umumiy hisobda 1 million dollar evaziga mahalliy fuqaroga sotishga kelishib, oldindan 200 ming dollar talab qilgan.
Natijada mazkur shaxslar tarkibida 1 kilo simob kimyoviy moddasi mavjud bo‘lgan qo‘lbola usuldagi qurilmani 200 ming dollar evaziga mahalliy fuqaroga sotayotgan vaqtida ashyoviy dalillar bilan qo‘lga olingan.
Hozirda mazkur shaxslarga nisbatan Jinoyat kodeksining tegishli moddalari bilan jinoyat ishi qo‘zg‘atilishi rejalashtirilib, tergovga qadar surishtiruv harakatlari olib borilmoqda.
Izoh (0)