Sobiq deputat, ayni paytda tabiat resurslari vazirining maslahatchisi Rasul Kusherbayev “Ozodlik”ning O‘zbekiston neft va gaz konlari bo‘yicha surishtiruviga munosabat bildirdi.
“To‘g‘risini aytaman “Ozodlik”ning O‘zbekiston neft va gaz konlari bo‘yicha surishtiruvini ko‘rganimda ancha ta’sirlandim. Nahotki, shu ma’lumotlar rost bo‘lsa, degan savol o‘ylantirdi. Lekin O‘zbekiston rasmiylari, sohaga mas’ul tashkilotlar nima derkin, deb kutdim. Agar rasmiylar bu masalada jimlik saqlasa demak bu ma’lumotlar rost, degan fikrga borardim”, — deydi Kusherbayev.
Sobiq deputat Energetika vazirligi , “O‘zbekneftgaz” kompaniyasi tomonidan berilgan munosabatlar, jurnalist va blogerlarning fikri qolaversa, mas’ul tashkilotlar tomonidan ko‘rsatilgan dalillardan so‘ng “Ozodlik” ikkita jiddiy xatolikka yo‘l qo‘ygan deb hisoblamoqda.
“Birinchisi, O‘zbekistonning butun gaz va neft konlarini barcha huquqlar bilan 35 yilga bitta kompaniyaga berishi va 35 milliard AQSH dollari bir shaxsga tegishli korxonaga (Eriell, Enter Engineering) ishlatilgan degan iddao noto‘g‘ri bo‘lib chiqdi. Ushbu ayblovlarni ilgari surgan “Ozodlik” ijodkorlarida agar O‘zbekiston rasmiylari ko‘rsatgan dalillardan kuchli isbotlar bo‘lsa buni ko‘rsatishi kerak. Agar bunday dalil bo‘lmasa, xatoga yo‘l qo‘yilgani tan olinishi kerak. Bu ham ommaviy axborot vositalarining munosib pozitsiyasi bo‘ladi. Ikkinchi, O‘zbekiston rasmiylari bildirgan normativ hujjatlar qandaydir korxonalarning buxgalterlik hujjatlaridan ko‘ra ishonarli chiqdi. Va eng muhimi barcha kelishuvlar ro‘y rost aytildi. Surishtiruvdan avval mana shu ehtimoliy argumentlar inobatga olinishi kerak edi”, — deydi Kusherbayev.
Uning qayd etishicha, “Ozodlik”ning surishtiruvi chuqur asoslanmagan iddaolar bilan ommaga axborot tarqatishga bo‘lgan urinishga o‘xshab tuyulmoqda. Bu ishdan maqsad nima ekani tushunarsizligicha qoldi.
“Nima bo‘lganda ham bir shaxs yoki bir guruh emas, butun mamlakat hayoti bilan bog‘liq ma’lumot tarqatishdan oldin uning oqibati qanday bo‘lishini inobatga olgan holda, har tomonlama asosli faktlarga tayanilishi kerak.
Ayni o‘rinda ushbu material tom ma’noda O‘zbekiston xalqini junbushga keltirishi mumkin. Asoslanmagan va ishonchsiz ma’lumotlarni xalqaro omma ixtiyoriga havola etish esa odamlarni manipulyatsiya qilish, deya baholanadi”, — deb ta’kidladi sobiq deputat.
Izoh (0)