Afg‘onistonda hokimiyat tepasida turgan “Tolibon” harakati juma namoziga chiqmaydigan afg‘onlarning do‘konlarini yopishni boshladi. Bu haqda Etilaatroz internet nashri xabar bermoqda.
Nashr ma’lumotlariga ko‘ra, mamlakat janubidagi Helmand viloyatining maʼmuriy markazi Lashkargoh shahrida toliblar shu sabab bilan 70 ga yaqin do‘konni yopgan.
2022-yilning noyabr oyida “Tolibon” savdogarlarga masjidda juma namoziga qatnashish talabini qo‘ygandi.
“Tolibon” vakillari do‘kondorlarni 10 ming afg‘oni (111 dollar) miqdorida jarima to‘lagandan keyingina bizneslarini davom ettirishi mumkinligidan ogohlantirgan. Bu mahalliy vaziyat bilan solishtirganda katta summa, deydi nashr.
Avvalroq “Tolibon” harakati Afg‘onistonning Balx viloyatida o‘rnatilgan Alisher Navoiy yodgorligini buzib tashlagan edi. Shuningdek, “Tolibon” vakillari mamlakatda ayollarning ta’lim olishi taqiqlanishiga norozilik bildirib diplomlarini yirtib tashlagan professorni hibsga olgan.
Izoh (0)