AQSH prezidenti Jo Bayden Polsha rahbari Anjey Duda va mamlakat xalqiga Rossiya bosqini boshidanoq Ukrainaga yordam berishdagi katta roli uchun shaxsan minnatdorlik bildirish maqsadida Polshaga tashrif buyuradi. Bu haqda Vashingtondagi brifingda Oq uy Milliy xavfsizlik kengashi koordinatori Jon Kirbi ma’lum qildi.
Kirbining ta’kidlashicha, bu safar Oq uy rahbari uchun muhim ahamiyat kasb etadi.
“U Polsha va NATOning boshqa ko‘plab a’zolari hozirda ko‘rsatayotgan jasorat va birlik qanchalik muhim ekani haqida gapirmoqchi”, — dedi Kirbi. “Afsuski, tez orada keng ko‘lamli urushning ikkinchi yili boshlanadi”, — deb qo‘shimcha qildi u.
“Polsha kuchli ittifoqchi, Ukrainaning yirik tarafdori va nafaqat AQSH qo‘shinlarini, balki millionlab ukrainalik qochqinlarni ham saxiylik bilan qabul qildi”, — deya ta’kidladi Kirbi.
Yanvar oyi oxirida Oq uy Ukrainadagi urushga bir yil to‘lishi munosabati bilan syurpriz tayyorlayotganini ma’lum qilgandi.
Avvalroq Polsha va Latviya rahbarlari fevral oyida Bayden Markaziy Yevropaga tashrif buyurishini aytgandi. Polsha ommaviy axborot vositalarida Ukraina, Polsha va AQSH prezidentlarining uchrashuvi Polshada bo‘lishi mumkinligi haqida xabarlar tarqaldi. Biroq Ukraina prezidenti Vladimir Zelenskiy hali uchrashuvga taklifnoma olmaganini aytdi.
Izoh (0)