Афғонистонда ҳокимият тепасида турган “Толибон” ҳаракати жума намозига чиқмайдиган афғонларнинг дўконларини ёпишни бошлади. Бу ҳақда Etilaatroz интернет нашри хабар бермоқда.
Нашр маълумотларига кўра, мамлакат жанубидаги Ҳелманд вилоятининг маъмурий маркази Лашкаргоҳ шаҳрида толиблар шу сабаб билан 70 га яқин дўконни ёпган.
2022 йилнинг ноябрь ойида “Толибон” савдогарларга масжидда жума намозига қатнашиш талабини қўйганди.
“Толибон” вакиллари дўкондорларни 10 минг афғони (111 доллар) миқдорида жарима тўлагандан кейингина бизнесларини давом эттириши мумкинлигидан огоҳлантирган. Бу маҳаллий вазият билан солиштирганда катта сумма, дейди нашр.
Аввалроқ “Толибон” ҳаракати Афғонистоннинг Балх вилоятида ўрнатилган Алишер Навоий ёдгорлигини бузиб ташлаган эди. Шунингдек, “Толибон” вакиллари мамлакатда аёлларнинг таълим олиши тақиқланишига норозилик билдириб дипломларини йиртиб ташлаган профессорни ҳибсга олган.
Изоҳ (0)