14-fevral kuni O‘zbekiston elchixonasida Yaponiyaning All season travel kompaniyasi rahbari Kazuxisa Kavakami bilan uchrashuv bo‘lib o‘tdi, deb xabar bermoqda “Dunyo” axborot agentligi.
Qayd etilishicha, unda Yaponiya vakili so‘nggi yillar davomida mamlakatda sayyohlar uchun yaratilgan sharoitlar, yangi qurilgan mehmonxonalar va turizm infratuzilmasi bilan yaqindan tanishgan.
Kazuxisa Kavakami O‘zbekistonda sayyohlik sohasida koronavirus pandemiyasidan keyingi holatni bilish maqsadida 2022-yil noyabr oyida mamlakatda bo‘lganini ma’lum qilgan.
“Safarim davomida Toshkent, Samarqand, Buxoro va Xiva shaharlari bilan tanishdim. Ushbu hududlarda turizm infratuzilmasi jadal rivojlangani, yangi mehmonxonalar, ovqatlanish maskanlari, hunarmandchilik do‘konlari bir me’yorda ishlayotgani meni juda quvontirdi”, — degan u.
All season travel kompaniyasi rahbari, shuningdek, elchixona tashabbuskorligida yapon sayyohlik kompaniyalari bilan hamkorlikda Yaponiyaning yetakchi gazeta, jurnal va boshqa OAVda O‘zbekistonning turizm salohiyatini targ‘ib qilishga bag‘ishlangan turkum maqolalar e’lon qilingani natijasida yapon fuqarolarining mamlakatga bo‘lgan qiziqishi ortib borayotganini ta’kidlagan.
Uchrashuv yakunlari bo‘yicha o‘zaro hamkorlikda Yaponiyaning yirik shaharlarida O‘zbekiston sayyohlik salohiyatini targ‘ib qilishga qaratilgan tadbirlar, OAVda materiallar joylashtirish, shuningdek, Yaponiyaning yetakchi telekompaniyasi delegatsiyasining O‘zbekistonga ijodiy safarini ishlab chiqishga kelishib olingan.
Izoh (0)