14 февраль куни Ўзбекистон элчихонасида Япониянинг All season travel компанияси раҳбари Казухиса Каваками билан учрашув бўлиб ўтди, деб хабар бермоқда “Дунё” ахборот агентлиги.
Қайд этилишича, унда Япония вакили сўнгги йиллар давомида мамлакатда сайёҳлар учун яратилган шароитлар, янги қурилган меҳмонхоналар ва туризм инфратузилмаси билан яқиндан танишган.
Казухиса Каваками Ўзбекистонда сайёҳлик соҳасида коронавирус пандемиясидан кейинги ҳолатни билиш мақсадида 2022 йил ноябрь ойида мамлакатда бўлганини маълум қилган.
“Сафарим давомида Тошкент, Самарқанд, Бухоро ва Хива шаҳарлари билан танишдим. Ушбу ҳудудларда туризм инфратузилмаси жадал ривожлангани, янги меҳмонхоналар, овқатланиш масканлари, ҳунармандчилик дўконлари бир меъёрда ишлаётгани мени жуда қувонтирди”, — деган у.
Алл сеасон травел компанияси раҳбари, шунингдек, элчихона ташаббускорлигида япон сайёҳлик компаниялари билан ҳамкорликда Япониянинг етакчи газета, журнал ва бошқа ОАВда Ўзбекистоннинг туризм салоҳиятини тарғиб қилишга бағишланган туркум мақолалар эълон қилингани натижасида япон фуқароларининг мамлакатга бўлган қизиқиши ортиб бораётганини таъкидлаган.
Учрашув якунлари бўйича ўзаро ҳамкорликда Япониянинг йирик шаҳарларида Ўзбекистон сайёҳлик салоҳиятини тарғиб қилишга қаратилган тадбирлар, ОАВда материаллар жойлаштириш, шунингдек, Япониянинг етакчи телекомпанияси делегациясининг Ўзбекистонга ижодий сафарини ишлаб чиқишга келишиб олинган.
Изоҳ (0)