Shavkat Mirziyoyevning topshirig‘iga asosan Tashkent Index majmuasi Turkiyaga yuboriladigan insonparvarlik yordami ko‘rinishadagi mahsulotlar yig‘iladigan asosiy baza bo‘ladi.
Mazkur topshiriqqa asosan 11-fevral kuni bosh vazir Abdulla Aripov Turkiya elchisi Olgan Bekarni majmuaga taklif qilib, bu yer vaqtincha Turkiyaga insonparvarlik yordami ko‘rinishida hayotiy zarur vosita va mahsulotlar jamlanadigan markazga aylantirilishini ma’lum qildi.
Asosiy baza bo‘lishi kutilayotgan 16 ming kvadrat metrlik Tashkent Index’da ayni paytda 21 ta angar bor. Bu angarlarga mahsulotlar turiga qarab jamlanadi.
“Hurmatli prezidentimiz topshiriq berdilar, yurdoshlarimiz turk xalqiga yordam berishni istashyapti va har xil joylarda markazlar tashkil etishyapti. Mahsulotlarni Turkiyaning talafot ko‘rgan yeriga yetkazib berish juda qiyin masala. Buni juda yaxshi bilamiz u yerlarning atrofi o‘rab qo‘yiladi. Elchixona tomonidan ayni paytda turk birodarlarimizga zarur bo‘lgan mahsulotlarning ro‘yxati taqdim etilsa, bu ro‘yxat homiylarga beriladi. Mahsulotlarni Turkiyaga yetkazilishini ham chiroyli holatda o‘zimiz tashkil qilib beramiz”, — dedi bosh vazir.
Bunga javoban elchi haqiqatan shunday katta joyga ehtiyoj sezilganini aytib, hozirda bu ishlar katta masshtabda amalga oshirilayotgani uchun davlat rahbari Shavkat Mirziyoyev va o‘zbekistonliklarga Turkiya tomonining chuqur minnatdorchiligini yetkazdi.
Mavzuga doir: O‘zbekistondan Turkiyaga insonparvarlik yordami yig‘ish vaqtincha to‘xtatildi
Izoh (0)