Шавкат Мирзиёевнинг топшириғига асосан Tashkent Index мажмуаси Туркияга юбориладиган инсонпарварлик ёрдами кўринишадаги маҳсулотлар йиғиладиган асосий база бўлади.
Мазкур топшириққа асосан 11 февраль куни бош вазир Абдулла Арипов Туркия элчиси Олган Бекарни мажмуага таклиф қилиб, бу ер вақтинча Туркияга инсонпарварлик ёрдами кўринишида ҳаётий зарур восита ва маҳсулотлар жамланадиган марказга айлантирилишини маълум қилди.
Асосий база бўлиши кутилаётган 16 минг квадрат метрлик Tashkent Index‘да айни пайтда 21 та ангар бор. Бу ангарларга маҳсулотлар турига қараб жамланади.
“Ҳурматли президентимиз топшириқ бердилар, юрдошларимиз турк халқига ёрдам беришни исташяпти ва ҳар хил жойларда марказлар ташкил этишяпти. Маҳсулотларни Туркиянинг талафот кўрган ерига етказиб бериш жуда қийин масала. Буни жуда яхши биламиз у ерларнинг атрофи ўраб қўйилади. Элчихона томонидан айни пайтда турк биродарларимизга зарур бўлган маҳсулотларнинг рўйхати тақдим этилса, бу рўйхат ҳомийларга берилади. Маҳсулотларни Туркияга етказилишини ҳам чиройли ҳолатда ўзимиз ташкил қилиб берамиз”, — деди бош вазир.
Бунга жавобан элчи ҳақиқатан шундай катта жойга эҳтиёж сезилганини айтиб, ҳозирда бу ишлар катта масштабда амалга оширилаётгани учун давлат раҳбари Шавкат Мирзиёев ва ўзбекистонликларга Туркия томонининг чуқур миннатдорчилигини етказди.
Мавзуга доир: Ўзбекистондан Туркияга инсонпарварлик ёрдами йиғиш вақтинча тўхтатилди
Изоҳ (0)