Qashqadaryo viloyati Dehqonobod tumanida 9-fevral kuni tuproq ko‘chkisi sodir bo‘lgani sababli poyezdlar harakati to‘xtatilgandi. Viloyat transport boshqarmasi yo‘lovchilar o‘z manziliga yetkazilishi bo‘yicha ma’lumot berdi.
Qayd etilishicha, Qarshi temir yo‘l bekatiga 9-fevral kuni soat 21:18 da kelgan 330-sonli Volgograd—Dushanbe poyezdining 35 nafar yo‘lovchisiga Surxondaryo viloyatining Tojikiston bilan chegaradosh hududiga bepul yetib olishi uchun 1 ta 50 o‘rindiqli “Golden Dragon” rusumli avtobus ajratilgan.
Bundan tashqari, 10-fevral kuni Qarshi temir yo‘l bekatiga soat 03:30 da kelgan 130-sonli Andijon—Termez poyezdining Surxondaryo viloyatiga ketayotgan 165 nafar yo‘lovchisiga doimiy yashash manziliga borishi uchun zarur yordam ko‘rsatilgan. Temir yo‘l bekatida Surxondaryo viloyatiga qatnovchi 48 ta yengil avtomashina (taksi) hozir bo‘lishi ta’minlangan.
Mavzuga doir: Voqea uch yil o‘tib, yana takrorlandi: Dehqonobodda ko‘chki sodir bo‘lishi, temiryo‘lni ishdan chiqardi
Izoh (0)