Ayni vaqtda prezident Shavkat Mirziyoyev Jizzax shahrida sanoatni rivojlantirish va qayta tiklanuvchi energiya manbalari masalalarida yigʻilish oʻtkazmoqda. Bu haqda “Daryo” muxbiri xabar berdi.
Davlat rahbari viloyatda elektr yetishmovchiligi 2022-yilda 123 million kilovatt soatga yetgani, 2023-yilda bu raqam 156 million kilovatt soat boʻlishi kutilayotganini taʼkidladi.
“Viloyatda kamida 2 ming Megavatt qayta tiklanuvchi energiya manbalar uchun salohiyat bor. Shundan kelib chiqib, Jizzaxda 2023-yilda 270 Megavatt quyosh energiyasi quvvatlari ishga tushiriladi va shuning hisobiga 236 million kilovatt soat ishlab chiqarilib, tanqislik ortigʻi bilan qoplanadi. Buning hisobiga, jami 71 million kub metr gaz tejaladi”, — dedi prezident.
Taʼkidlanishicha, Gʻallaorolda 220 Megavattli yirik quyosh stansiyasi ishga tushiriladi. 2023-yilda bu stansiya toʻliq quvvatga chiqib, 500 million kilovatt soat elektr olinadi va viloyat ehtiyojining 20 foizini qoplaydi.
Shuningdek, ijtimoiy soha va davlat idoralari binolarida 5 Megavattli quyosh panellari oʻrnatilishi hisobiga, 2023-yilda 5 million kilovatt soat taʼminlanadi. Buning uchun, banklar ishtirokida alohida Kompaniya tashkil qilinayapti. Jizzaxda bu kompaniya 5 million dollar hisobiga, 250 ta binoda quyosh panellari oʻrnatib, “yashil energiya” bilan taʼminlaydi.
Davlat rahbarining taʼkidlashichi, sanoat zonasi va tadbirkorlar binolarida 15 Megavattli quvvatlar joylashtiriladi. Buning uchun, tadbirkorlarga banklar tomonidan 100 milliard soʻm kredit resurslari ajratiladi.
“Aholi xonadonlariga 8 Megavattli qayta tiklanuvchi energiya manbalarini oʻrnatish uchun, jozibador sharoitlar yaratiladi. Bunda, aholi oʻz xonadonida panel oʻrnatib, ehtiyojidan ortgan har bir kilovati davlat tomonidan 1 ming soʻmdan sotib olinadi (hozirgi tarif 295 soʻm)”, — dedi Shavkat Mirziyoyev.
Prezident tadbirkorlarning oʻz ehtiyojlari uchun 5, 10, 15 Megavattli quyosh stansiyalari qurish tashabbuslari ham qoʻllab-quvvatlanishi haqida gapirdi. Bu orqali, 2023-yilda 30 Megavatt quvvatlar yaratiladi va 28 million kilovatt soat elektr ishlab chiqariladi.
Bundan tashqari, Zafarobodda 2023-yilda jami 2 Megavattli 2 ta kichik GES quriladi va bu yil 2,4 million kilovatt soat elektr ishlab chiqaradi. Shu bilan birga, viloyatda 10 ming kilometr irrigatsiya tarmoqlari va kanallar bor.
Prezident Forishda 150 Megavattli yirik quyosh stansiyasi loyihasi boshlanishini aytdi.
“Ushbu stansiya toʻliq quvvatga chiqqanda, 370 million kilovatt soat elektr ishlab chiqaradi.
Shuningdek, Jizzax shahrida 2023-yilda bir vaqtning oʻzida ham issiqlik, ham elektr energiyasi ishlab chiqaruvchi «Ko-generatsiya” markazi quriladi. Uning umumiy quvvati 14 Megavatt boʻlib, toʻliq koʻmirda ishlaydi», — dedi davlat rahbari.
Bu orqali, 60 ta koʻp qavatli uylar issiqlik bilan taʼminlanishi, 35 million kilovatt soat elektr ishlab chiqarilishi taʼkidlandi.
Izoh (0)