Xabaringiz bor, bugun Qashqadaryo viloyatining Dehqonobod tumanida sodir bo‘lgan ko‘chki sabab temiryo‘l ishdan chiqdi. Natijada poyezdlar harakati to‘xtatildi.
Qayd etilishicha, bugun soat 06:10 da Chashma-Oqrabot stansiyalari oralig‘ining 103-km 5-6 piket qismida tuproq ko‘chkisi sodir bo‘lgan. Shu sababli poyezdlar harakati vaqtincha to‘xtatilib, holatni bartaraf etish maqsadida hududga mutaxassislar jalb qilingan.
Qo‘shimcha qilinishicha, mazkur voqea 2023-yilning 9-fevral kuni 80/79-sonli Toshkent—Termiz—Toshkent va 682/681-sonli Qumqo‘rg‘on—Sariosiyo—Qumqo‘rg‘on yo‘nalishlaridagi poyezdlar harakatining vaqtincha to‘xtatilishiga sabab bo‘lgan.
Dehqonobodda bunday voqea dastlab 2019-yilning aprel oyida sodir bo‘lgandi.
2019-yil 6-aprel kuni soat 02:08 da Dehqonobod tumani hududida yuk poyezdi kuchli jala oqibatida cho‘kkan temiryo‘l uchastkasida tiqilib qoldi. Hodisa Oqrabot—Dehqonobod temiryo‘lining 98-kilometrida sodir bo‘lgandi.
56 ta vagondan (ularning 26 tasida yuk bo‘lgan, 30 tasi bo‘sh) temir yo‘l tarkibini boshqarib kelayotgan ikkita elektrovoz kuchli yog‘ingarchiliklar natijasida 2,5—3 metrga cho‘kkan 50—60 metr uzunlikdagi uchastkada tiqilib qolgan. So‘ngra manyovrli elektrovoz yordamida temiryo‘lning cho‘kkan qismidan 56 ta vagon tekis sathga olib chiqilgan. O‘sha paytda temir yo‘l uchastkasini qayta tiklash uchun “O‘zbekiston temir yo‘llari”ning ikkita avariya-qutqaruv poyezdi, Qarshi hududiy temiryo‘l uzelining 180 nafar xodimi va texnikalari jalb qilingan.
Bunday holat o‘sha yili 30-aprel kuni soat 21:25 da Toshguzar—Boysun—Qumqurg‘on temiryo‘lining 103-kilometrida Sariosiyo—Toshkent yo‘lovchi poyezdi o‘tayotgan vaqtda ham sodir bo‘lgan.
“O‘zbekiston temir yo‘llari” kompaniyasining Axborot-tahlil mediamarkazi o‘sha payt OAV so‘roviga javoban hodisa “Oqrabot” stansiyasidan 8-kilometr masofadagi “Oqrabot—Chashmaihofizon” uchastkasida sodir bo‘lganini bildirgan.
Poyezd harakati yo‘nalishida o‘ng tomonda tuproqning ko‘chishi uchta vagonning harakatini cheklab qo‘ygan. Poyezd brigadasining tezkor harakatlari natijasida yo‘lovchilar boshqa vagonlarga o‘tqazilgan va harakatini davom ettirgan. Yo‘lovchilardan hech kim jarohat olmagan. Shaxsiy buyumlar va hujjatlar keyinroq o‘z egalariga topshirilgan.
22:10 da esa barcha yo‘lovchilar “Dehqonobod” stansiyasiga muvaffaqiyatli etib borgan. Hodisa joyida esa to‘liq texnik ko‘rik amalga oshirilgan. Yo‘lovchilarni joylashtirish uchun ikkita vagon qo‘shilgandan so‘ng poyezd belgilangan manzilga yo‘l olgan.
Dehqonobodda kuchli yomg‘ir sabab nafaqat temiryo‘l, avtomobil yo‘llari o‘pirilib tushish holatlari ham sodir bo‘lgan.
Bunday voqea 2019-yilning aprel oyida Dehqonobod tumanining “Oqrabot” mahalla fuqarolar yig‘inida sodir bo‘lgan. Tog‘-adirliklardan iborat hududda kuchli yomg‘ir yog‘ishi natijasida yer yumshab, asfalt qoplangan yo‘l o‘pirilib ketgan. O‘sha vaqtda yo‘lning mazkur qismida mashinalar harakatlanmagani uchun hech qanday texnik vositalari va odamlar jabrlanmagan.
Avtomobil yo‘lining o‘pirilib tushishi bilan bog‘liq ikkinchi holat shu hududdan sal narida, aniqrog‘i Oqrabotdan Surxondaryo viloyatining Boysun tumani hududiga kirgan joyda sodir bo‘lgan.
2019-yilning 21-aprel kuni kechki payt M39 Toshkent—Termiz avtomobil yo‘lining 1320-kilometrida ham yer o‘pirilib tushgan. Maʼlum bo‘lishicha, asfalt yo‘lning ustida “buloqcha” ko‘z ochib, suv oqishni boshlagan. O‘sha buloqning ko‘z ochishi hududning 2019-yil 21-aprel kuni o‘pirilib tushishiga sabab bo‘lgandi.
Darvoqe, bugun Qashqadaryo viloyati hokimi Murodjon Azimov ham ko‘chki sodir bo‘lgan joyga borib, holatni o‘z ko‘zi bilan ko‘rgan va masʼullarga hududdagi nosozlikni tezda bartaraf etish bo‘yicha topshiriq bergan.
Izoh (0)