Ayni vaqtda prezident Shavkat Mirziyoyev Jizzax shahrida sanoatni rivojlantirish va qayta tiklanuvchi energiya manbalari masalalarida yigʻilish oʻtkazmoqda. Bu haqda “Daryo” muxbiri xabar berdi.
Prezident Jizzax sanoatining hozirgi jadal rivojlanishini davom ettirib, 2023-yilda viloyat sanoatini 14 foizga oshirish kerakligini taʼkidladi. Davlat rahbari bu borada masʼullarga qator topshiriqlar berdi. Xususan:
Bosh vazir oʻrinbosari, investitsiyalar, sanoat va savdo vazirligi, Jizzax viloyati hokimligiga Jizzaxda 2023-yilda 750 million dollarlik 10 ta yirik loyiha va 580 million dollarlik 110 ta hududiy sanoat loyihasini ishga tushirish boʻyicha topshiriq berildi. Buning hisobiga sanoatda 7,5 mingta yangi ish oʻrinlari yaratiladi.
Investitsiyalar, sanoat va savdo vazirligi Jizzaxdagi sanoat zonalarida ishga tushadigan 150 million dollarlik 58 ta loyihaga masʼul boʻladi. “Oʻzavtosanoat” raisiga sentyabr oyida 80 million dollar investitsiya hisobiga elektromobil zavodini ishga tushirish topshirildi.
Togʻ-kon sanoati va geologiya vazirligi va Investitsiyalar, sanoat va savdo vazirligiga oʻn kun muddatda “Uchquloch” (Forish tumani) konini tiklash boʻyicha xorijiy investorlar (Turkiya) bilan shartnomani imzolab, 1-maygacha burgʻilash ishlarini boshlash topshirigʻi berildi.
Bunga 200 million dollar investitsiya jalb qilinadi va 600 ta ish oʻrni yaratiladi.
Izoh (0)