Ayni vaqtda prezident Shavkat Mirziyoyev Jizzax shahrida sanoatni rivojlantirish va qayta tiklanuvchi energiya manbalari masalalarida yigʻilish oʻtkazmoqda. Bu haqda “Daryo” muxbiri xabar berdi.
Prezident qurilish va zamonaviy energotejamkor materiallar ishlab chiqarish boʻyicha mutasaddilarga qator topshiriqlarni berdi.
Jumladan, Investitsiyalar, sanoat va savdo vaziri oʻrinbosari, “Oʻzsanoatqurilishbank” boshqaruvi raisi va viloyat hokimiga 2023-yilda qurilish materiallari ishlab chiqarish boʻyicha 460 million dollarlik 31 ta loyihani ishga tushirish topshirildi.
Togʻ-kon sanoati va geologiya vazirligi Jizzax viloyati hokimi bilan birga, 1-iyunga qadar viloyatdagi yuqori salohiyatli noruda konlariga tadbirkorlarni jalb qilib, 60 ta loyihani boshlash topshirildi. Xususan, yil yakuniga qadar geologiya-qidiruv ishlarini oʻtkazib, yangi konlar aniqlash topshigʻiri berildi.
Forish klasterida ikki oy muddatda viloyat hokimi va “Oʻzsanoatqurilishbank” boshqaruvi raisi sendvich panel, gazoblok kabi yangi turdagi energiya tejamkor qurilish materiallari ishlab chiqarish boʻyicha 20 ta loyihani boshlaydi.
“Oʻzsanoatqurilishbank” boshqaruvi raisiga, shuningdek, “Sanoat ipotekasi” dasturini boshlab, tadbirkorlarga 2 yillik imtiyozli davr bilan 7 yil muddatga birinchi bosqichda 50 million dollar resurs ajratish topshirigʻi berildi.
Bundan tashqari, “Oʻzsanoatqurilishbank” boshqaruvi raisiga ikki oy muddatda qurilish materiallari boʻyicha Jizzaxda “Tadbirkorlar maktabi”ni tashkil etish topshirildi.
Oliy taʼlim, fan va innovatsiyalar vazirligiga sohaga yangi tajriba va innovatsiyani olib kirish maqsadida, Forish klasteridagi har bir korxonaga yetakchi olim va texnologlarni biriktirish topshirildi.
Izoh (0)