Meta икки йиллик тақиқдан сўнг АҚШ собиқ президенти Дональд Трампнинг Facebook ва Instagram аккаунтларини тиклади. Reuters агентлиги бунга биринчилардан бўлиб эътибор қаратди.
Январь ойида Meta компаниясининг глобал масалалар бўйича президенти Ник Клегг сиёсатчининг Facebook ва Instagram’даги аккаунтларини тиклаш режасини эълон қилган эди. Унинг тушунтиришича, блокировка Трампнинг 2024 йилги президентлик сайловларида қатнашиш режалари билан боғлиқ ҳолда бекор қилинади.
Шу билан бирга, Клегг таъкидлаганидек, ижтимоий тармоқлар қоидаларини қайтадан бузса, АҚШ собиқ президенти қолганларга нисбатан жиддийроқ жазога тортилади: агар Трамп Meta қоидаларига зид контентни чоп этса, тегишли пост ўчириб ташланади, аккаунтнинг ўзи яна бир ойдан икки йилгача бўлган муддатга блокланади.
Трамп 34 ва 23 миллион обуначига эга бўлган Facebook ва Instagram аккаунтларига қайтадими ёки йўқми, номаълум. Илгари унинг аккаунти Twitter томонидан блокдан чиқарилган эди, бироқ ҳозирча сиёсатчи у ерда ҳеч нарса чоп этмаган.
Ижтимоий тармоқлар 2021 йил 6 январда бўлиб ўтган Капитолийга ҳужумдан кейин Дональд Трампнинг аккаунтларини блоклаб қўйганди.
Хусусан, Meta Тармп компаниянинг ижтимоий тармоқларида тартибсизликларни мақтагани учун унинг саҳифасини тўсиб қўйган.
Изоҳ (0)