Жанубий Африка республикасида (ЖAR) электр узилиши тўлқинлари давом этаётгани сабабли миллий офат режими эълон қилинди, деди мамлакат президенти Сирил Рамафоса.
“Биз чуқур энергетика инқирози гирдобидамиз. Инқироз аста-секин ривожланиб, жамиятнинг барча соҳаларини қамраб олди. Унинг қишлоқ хўжалиги, кичик бизнес, сув инфратузилмаси ва транспорт тармоғига таъсирини камайтириш учун ҳаракат қилишимиз керак”, — деди Рамафоса ўзининг парламентга йиллик мурожаатида.
Фавқулодда ҳолат эълон қилиш ҳукуматга инқирозга жавоб бериш учун қўшимча ваколатлар, жумладан, камроқ бюрократик кечиктиришлар билан фавқулодда чоралар кўриш имконини беради.
FT маълумотларига кўра, сўнгги ойларда Жанубий Африкадаги истеъмолчилар кунига 10 соатгача электрсиз ўтиришга мажбур бўлмоқда: давлат энергетика монополияси Эском иссиқлик электр станцияси ускуналари эскиргани ва мавжуд қувватни сақлаш билан боғлиқ муаммолар туфайли шундай чораларни кўрган.
Газетанинг ёзишича, 2022 йилда жанубий африкаликлар Эском электр станцияларидаги авариялар туфайли аввалги йилга қараганда икки баробар кўпроқ электр узилишларини бошдан кечирган. Ўчиришлар декабрь ва январь ойларида ҳам давом этди, одатда бу вақтда ЖARда электр тармоқларига юкланиш паст бўлади.
Расмийлар иқтисодиёт учун кунлик зарарни 57 миллион долларга баҳолади. Уларнинг тахминига кўра, 2023 йилда ЯИМ ўсиши ўтган йилги 2,5 фоизга нисбатан 0,3 фоизни ташкил этади.
Изоҳ (0)