Turkiya Rossiya va Ukraina o‘rtasidagi urushning kuchayishiga va Qora dengizga yangi harbiy kemalarning kirib kelishiga qarshi, dedi mamlakat tashqi ishlar vaziri Mevlut Chavusho‘g‘li. Bu haqda Anadolu xabar bermoqda.
“Anqara har ikki davlat bilan ham yaxshi munosabatlarga ega. Shuning uchun ham biz sanksiyalarni qo‘llab-quvvatlamadik. Ammo, albatta, biz Montryo konvensiyasi talablariga qat’iy rioya qilgan holda urushni rad etamiz”, — dedi vazir.
1936-yilgi konvensiyaga ko‘ra, Turkiya urush paytida barcha mamlakatlar kemalarining Bosfor va Dardanel bo‘g‘ozlaridan o‘tishini tartibga solish huquqiga ega. Mart oyida Rossiyaning Ukrainadagi harbiy amaliyoti boshlanganidan keyin Anqara barcha harbiy kemalarning bo‘g‘ozlardan o‘tishini taqiqlagan edi.
2022-yilning fevralida Ukrainada Rossiya bosqini boshlanganidan beri Turkiya bir necha bor tomonlarni tinchlikka chaqirgan va o‘z vositachiligini taklif qilgan.
14-yanvar kuni Turkiya prezidentining matbuot kotibi Ibrohim Kalin mamlakat Ukrainada “mahalliy sulh” gʻoyasini ilgari surmoqchiligini hamda Rossiya va Gʻarb oʻrtasida “katta bitim” tuzish tarafdori ekanini aytdi.
Izoh (0)