AQSH Ukrainaga 2,2 milliard dollarlik harbiy yordam paketini tayyorlamoqda, uning tarkibidan ilk bor uzoq masofali raketalar, shuningdek, boshqa o‘q-dori va qurollar joy oladi, deb xabar berdi Reuters o‘z manbalariga tayanib.
Keyinroq agentlik aniqlik kiritishicha, gap150 km masofaga ucha oladigan GLSDB (Ground Launched Small Diameter Bomb) raketalari haqida ketmoqda. Bu qurollar Boeing va Saab Group tomonidan ishlab chiqarilgan, ular M270 va HIMARS kabi yoppasiga o‘t ochuvchi reaktiv tizimlardan uchiriladi.
Rossiyaning Ukrainadagi bosqini boshlangandan beri AQSH Kiyevga xavfsizlik uchun 26,7 milliard dollarlik yordam berdi. Iyun oyidan beri Qo‘shma Shtatlar Ukraina kuchlarini 20 ta HIMARS tizimlari va o‘q-dorilar bilan ta’minladi. HIMARS uchun Ukrainaga 80 kilometrgacha masofadagi nishonlarga zarba bera oladigan va sun’iy yo‘ldosh orqali boshqariladigan GMLRS raketalari yetkazib berilmoqda.
Eslatib o‘tamiz, 25-yanvar kuni AQSH hukumati Kiyevga 31 ta M1 Abrams og‘ir tanklarini topshirishini ma’lum qilgandi. O‘z navbatida, Germaniya hukumati ham Ukrainaga Germaniya qurolli kuchlari zaxirasidan 14 ta Leopard 2 tankini jo‘natishi va boshqa davlatlarga reeksport uchun ruxsat berishini tasdiqladi. Shu kuni Norvegiya va Slovakiya Mudofaa vazirligi ham tanklarni Ukrainaga o‘tkazish niyati borligini ma’lum qildi. Avvalroq Kiyevni tanklar bilan ta’minlash qarori Buyuk Britaniya, Fransiya va Polsha rasmiylari tomonidan e’lon qilingandi.
G‘arb davlatlari Kiyevga tanklar yetkazib berilishi haqida e’lon qilgach, Ukraina prezidenti Vladimir Zelenskiy mamlakat ulardan uzoq masofaga uchuvchi raketalar va jangovar samolyotlar olishni ham kutayotganini aytdi. Politico nashri xabar berishicha, G‘arb harbiy amaldorlari Ukrainaga qiruvchi samolyotlar yetkazib berish masalasini muhokama qilmoqda.
31-yanvar kuni AQSH prezident Jo Bayden AQSH Ukrainaga F-16 qiruvchilarini yetkazib bermasligini aytdi. Oq uy Baydenning so‘zlarini AQSH shusiz ham Ukraina armiyasi uchun juda muhim bo‘lgan katta miqdordagi qurollarni yetkazib berayotgani bilan izohladi.
Izoh (0)