Туркия Россия ва Украина ўртасидаги урушнинг кучайишига ва Қора денгизга янги ҳарбий кемаларнинг кириб келишига қарши, деди мамлакат ташқи ишлар вазири Мевлут Чавушўғли. Бу ҳақда Anadolu хабар бермоқда.
“Анқара ҳар икки давлат билан ҳам яхши муносабатларга эга. Шунинг учун ҳам биз санкцияларни қўллаб-қувватламадик. Аммо, албатта, биз Монтрё конвенцияси талабларига қатъий риоя қилган ҳолда урушни рад этамиз”, — деди вазир.
1936 йилги конвенцияга кўра, Туркия уруш пайтида барча мамлакатлар кемаларининг Босфор ва Дарданел бўғозларидан ўтишини тартибга солиш ҳуқуқига эга. Март ойида Россиянинг Украинадаги ҳарбий амалиёти бошланганидан кейин Анқара барча ҳарбий кемаларнинг бўғозлардан ўтишини тақиқлаган эди.
2022 йилнинг февралида Украинада Россия босқини бошланганидан бери Туркия бир неча бор томонларни тинчликка чақирган ва ўз воситачилигини таклиф қилган.
14 январь куни Туркия президентининг матбуот котиби Иброҳим Калин мамлакат Украинада “маҳаллий сулҳ” ғоясини илгари сурмоқчилигини ҳамда Россия ва Ғарб ўртасида “катта битим” тузиш тарафдори эканини айтди.
Изоҳ (0)