Bayden iqlim o‘zgarishini yadro urushidan ham xavfliroq deb atadi

Iqlim o‘zgarishi insoniyat hayoti uchun yadroviy urushdan ko‘ra ko‘proq xavf tug‘dirmoqda, dedi AQSH prezidenti Jo Bayden infratuzilmaga oid qonun loyihasidan keyin bir guruh tarafdorlari bilan uchrashuvda.

“Global isish insoniyatning mavjudligi uchun biz shu paytgacha duch kelgan eng jiddiy tahdid, jumladan, yadroviy quroldan ham jiddiy”, — deya Baydenning so‘zlarini keltirdi New York Post.

Oktabr oyida Bayden Kuba raketa inqirozidan keyin dunyo birinchi marta yadroviy qurol tahdidiga duch kelayotganini aytgandi. O‘shanda u Rossiya prezidenti Vladimir Putinning yadroga oid so‘zlarini jiddiy qabul qilishga chaqirib, uni “juda yaxshi” bilishini ta’kidlagan.

Baydenning bayonoti Putin qisman safarbarlik e’lon qilib, G‘arbni “yadroviy shantaj”da  ayblaganidan keyin yangragandi. U Rossiyada ham yadro quroli borligini eslatib, mamlakat himoya uchun barcha vositalarni ishga solishga tayyorligini ta’kidladi va Putinning bayonotini po‘pisa deb hisoblamaslikka chaqirdi.

NATO bosh kotibi Yens Stoltenberg yadro qurolidan har qanday tarzda foydalanish Rossiya uchun jiddiy oqibatlarga olib kelishini aytgan. AQSH mudofaa vaziri Lloyd Ostin Moskvaning “yadro quroliga ishoralarini” qoralagan, biroq u Rossiya Ukrainada undan foydalanishga tayyorlanayotgani bo‘yicha hech qanday belgilar ko‘rmaganini ta’kidlagan.