Avtomobil taʼmirlovchi ustaxona hamda anomal sovuqdan zarar ko‘rgan yosh tadbirkorga ko‘mak: Samarqandning Narpay hamda Paxtachi tumanida yoshlar muammosi o‘rganildi
DXXning Samarqand viloyati boshqarmasi boshlig‘i Abdug‘affor Ahmedov viloyatning Paxtachi hamda Narpay tumanlarida bo‘lib, yoshlar bilan muloqot qildi hamda yoshlarni qiynab kelayotgan muammolarga birgalikda yechim izladi. Bu haqda tuman hokimliklarining axborot xizmatlari xabar tarqatdi.
Maʼlum bo‘lishicha, DXX viloyat boshqarmasi boshlig‘i va yoshlar uchrashuvi bugun tashkil etilgan.
Uchrashuvda yoshlarning murojaat va takliflari tinglanib, joyida yechim topilmoqda. Jumladan, “Xudoyberdi” mahallasida istiqomat qiluvchi Adham Shodmonov o‘zi istiqomat qilib kelayotgan mahallada faoliyatini yo‘lga qo‘ygan avtomobillarni taʼmirlash ustaxonasini rivojlantirish uchun ko‘mak so‘radi. Shundan so‘ng hudud masʼullari yordamida holatga aniqlik kiritildi va ustaxona ahvolini yaxshilash, Adham Shodmonovga kerakli asbob-uskunalar yetkazib beriladigan bo‘ldi, — deyiladi Paxtachi tumani hokimligi axborot xizmatining rasmiy kanalida.
Shuningdek, rahbar va yoshlar uchrashuvida “Do‘ng” mahallasida yashovchi Shohrux Bobomurodov mahalladagi stadionning o‘rindiqlari yo‘qligini aytgan bo‘lsa, sport murabbiysi Marjona Qilicheva tuman markazidan sport zal qurib berilishida amaliy yordam berilishini so‘ragan.
Davlat xavfsizlik xizmatining viloyat boshqarmasi boshlig‘i yoshlar muammolarini o‘rganib, yordam so‘ralgan yoshlarning masalalarini hal etish yuzasidan masʼullarga topshiriq bergan.
Boshqarma boshlig‘i shu kuni Narpay tumanida yashovchi yoshlar bilan ham muloqot qilgan. Uchrashuvda so‘z olgan Muhriddin ismli 23 yoshli yigit tadbirkorlik bilan shug‘ullanishini, 20 nafardan ortiq yoshlarni ishli qilganini, anomal sovuq paytida 50 million so‘m miqdorida zarar ko‘rganini, shunga qaramasdan faoliyatini davom ettirib kelayotganini bildirgan. Tadbirkor ko‘rgan zarari sabab tokni kuchaytirib beruvchi apparatga muhtojligini, uni sotib ololmayotganini aytib, ko‘mak so‘ragan.
Mazkur murojaatga javob bergan boshqarma boshlig‘i murojaatchiga yordam berilishini, ayni kunda yoshlarga yaratilayotgan imkoniyatdan unumli foydalanish lozimligini bildirgan.
