Ўзбекистондаги тез тиббий ёрдам Damas’лари Volkswagen Caddy русумли янги автомобилларга алмаштирилади. Февралда жами 250 та ана шундай автомобиль республика бўйича тарқатилади (фото)

Республикадаги тез тиббий ёрдам марказларининг эски Damas’лари Volkswagen Caddy русумли янги А класс машиналарига алмаштириб берилади. Бу ҳақда “Дарё” мухбирига Республика тез тиббий ёрдам маркази директори ўринбосари Жасур Раимжонов хабар берди.

Жасур Раимжоновга кўра, ҳозир 110 та янги автомобиль мавжуд бўлиб, февраль ойида яна 140 дона шундай автомашина бутун республикага тарқатилади. Шу билан бирга, 2023–2024 йилларда 100 га яқин B ва C класс машиналар олиш режалаштирилмоқда. 

Ҳозирги кунда Тошкент шаҳрида Ford русумидаги 206 дона B класс автомашинаси мавжуд. Реанимобил ҳисобланувчи ушбу синф машиналари ҳаво сўргич, кардиомонитор, сунъий нафас бериш ускунаси (ИВЛ), ЭКГ аппаратлари, ЙТҲ ёки фавқулодда вазиятлардаги беморлар учун ишлатиладиган тиббий шиналар ва бошқа турдаги зарур қурилмалар билан тўлиқ жиҳозланган.

— А класс автомашинаси ҳисобланувчи Volkswagen Caddy’нинг B класс машиналардан фарқи — унинг нисбатан кичикроқлиги ва комплектацияда жиҳозлар камлиги. Энди C класс машиналарини ҳам Ўзбекистонга олиб келиш ниятимиз бор, — дейди Жасур Раимжонов.

Шунингдек, унинг маълум қилишича, ўтган йил ҳисобига Ўзбекистон миқёсида реанимобиллар сони 541 дона бўлган. 2022 йилнинг 11 ойи давомида 11,7 миллион дона тез ёрдамга чақириқ қайд этилган.