AQSH Ukrainaga F-16 qiruvchi samolyotlarini yetkazib bermaydi, dedi prezident Jo Bayden jurnalistlarga. Uning so‘zlarini AFP nashri Twitter’da keltirdi.
“Yo‘q”, dedi Bayden jurnalistning AQSH Ukrainaga F-16 samolyotlarini yuboradimi, degan savoliga javoban.
Keyinroq Oq uy vakili Jon Kirbi Baydenning so‘zlariga izoh berar ekan, AQSH shusiz ham Ukraina armiyasi uchun juda muhim bo‘lgan katta miqdordagi qurollarni yetkazib berayotganini ta’kidladi.
“Sizga shuni ayta olamanki, hozir katta hajmdagi qurollar yetkazib berilmoqda, kelgusi haftalar va oylarda ham yetkazib beriladi. Biz bilgan qurollar Ukraina qo‘shinlariga qishdagi janglarda yordam berish uchun juda muhim ahamiyatli bo‘ladi”, — dedi Kirbi.
Yanvar oyi oxirida Politico o‘z manbalariga tayanib, AQSH Mudofaa vazirligidagi bir guruh harbiy amaldorlar Pentagonni F-16 qiruvchi samolyotlarini Ukrainaga jo‘natishni ma’qullashga undayotgani haqida yozgandi.
AQSHning Rossiyadagi sobiq elchisi Maykl Makfolning aytishicha, Ukraina prezidenti Vladimir Zelenskiy F-16 qiruvchi samolyotlari yetkazib berilishi evaziga Rossiyadagi nishonlarga zarba berishda ulardan foydalanmaslik majburiyatini imzolashi mumkin.
Izoh (0)