Britaniya—Avstraliya tog‘-kon kompaniyasi Rio Tinto G‘arbiy Avstraliyada ichida radioaktiv seziy-137 nuklidi bo‘lgan kapsulani yo‘qotib qo‘ydi. 30-yanvar kuni kompaniya buning uchun uzr so‘rab chiqdi.
Kapsula diametri 6 millimetr va uzunligi 8 millimetr bo‘lgan metall silindr. U temir rudasi zichligini o‘lchaydigan datchikning bir qismi edi. Kapsula Rio Tinto konidan G‘arbiy Avstraliya poytaxti Pert shahriga olib ketilayotgan vaqtda tushib qolgan. Taxminlarga ko‘ra, kapsula kon va Pert o‘rtasidagi katta yo‘lga tushgan. Ularning orasidagi masofa 1300 kilometrdan oshadi.
Kapsulaning yo‘qolganini 25-yanvar kuni — datchik Pertga olib kelinganidan bir haftadan ko‘proq vaqt o‘tgach sezib qolishgan. Rasmiylar g‘arbiy avstraliyaliklarni voqea haqida ogohlantirdi va agar kapsulani kimdir topib olsa, undan kamida besh metr uzoqlikda turishni so‘radi, chunki seziy-137 teriga tegsa kuyish va nurlanish xavfini tug‘diradi.
G‘arbiy Avstraliya yong‘in va qutqaruv departamenti kapsulani qidirishni boshlagan. Qidiruv guruhi radiatsiya darajasini o‘lchaydigan asboblarni o‘zi bilan olgan. Biroq rasmiylar kapsula shosse bo‘ylab ketayotgan har qanday mashina shinasiga tiqilib qolishi va haydovchi va yo‘lovchilarni radiatsiya ta’siriga tushirishi mumkinligidan xavotirda, deb yozadi The Wall Street Journal.
Izoh (0)