“Daryo” nashri 27-yanvarda O‘zbekiston va jahonda sodir bo‘lgan eng muhim voqealarni e’tiboringizga havola etadi.
AQSH “Vagner”ni transmilliy jinoiy tashkilot deb e’lon qildi va unga aloqador Rossiya, Xitoy va Birlashgan Arab Amirliklari kompaniyalariga sanksiyalar kiritdi.
AQSH Moliya vazirligi “Vagner” xususiy harbiy kompaniyasini transmilliy jinoiy tashkilot deb e’lon qildi. Bu haqda vazirlik saytida xabar berildi.
AQSH Moliya vazirligi, shuningdek, “Vagner”ga aloqador bo‘lgan Rossiya, Xitoy, Lyuksemburg va Birlashgan Arab Amirliklari kompaniyalariga ham sanksiyalar kiritdi. Xususan, Xitoyning Spacety China kompaniyasi sanksiyalar ostida qoldi — AQSH ma’lumotlariga ko‘ra, u Ukrainaning sun’iy yo‘ldoshdan olingan suratlarini “Vagner”ga sotgan.
AQSH Moliya vazirligining sanksiyalar ro‘yxatiga, jumladan, Rossiya sanoat va savdo vazirligi rahbari Denis Manturov, Tatariston rahbari Rustam Minnixanov va Rossiya harbiy-sanoat majmuasining bir qator kompaniyalari kiritilgan.
Urush boshlanganidan buyon “Vagner” jangchilari Ukrainadagi jangovar harakatlarda faol ishtirok etmoqda, lekin ular rasmiy ravishda RF Mudofaa vazirligiga hisobot bermaydi.
Falastin Isroil bilan xavfsizlikni muvofiqlashtirish rejimini toʻxtatdi sabab va kutilmalar
Isroil mudofaa kuchlari (IMK) 27-yanvarga o‘tar kechasi G‘azo sektoridan mamlakat hududiga uchta raketa uchirilganini ma’lum qildi. Raketalarga javoban Isroil ham G‘azoga aviazarba yo‘llagan va HAMASning raketa ishlab chiqaruvchi yerosti inshootini yo‘q qilgan.
“Gʻazo sektorida sodir boʻlayotgan voqealar uchun HAMAS terrorchilik tashkiloti javobgar, aynan ular Isroil davlati xavfsizligini buzganlik uchun tovon to‘lamoqda”, — deyiladi IMKning Twitter’dagi xabarida.
OAV xabarlariga ko‘ra, G‘azodan otilgan raketalar Iordan daryosining g‘arbiy sohilidagi Jenin qochqinlar lagerida IMK operatsiyasi paytida to‘qqiz nafar falastinlikning o‘ldirilishiga javob bo‘ldi.
Aljazeera va Falastinning WAFA axborot agentligi ma‘lumotlariga ko‘ra, 26-yanvar kuni ertalab Isroil harbiylari Jeninga kirgan. U yerda snayperlar tomlardagi pozitsiyalarni egallab, shiddatli toʻqnashuvlarni keltirib chiqargan, askarlar esa Isroil xavfsizlik kuchlari yoʻlini toʻsmoqchi boʻlgan yosh falastinliklarga qarata oʻt ochgan. WAFA ma’lumotlariga ko‘ra, Isroil armiyasi qochqinlar lageridagi elektr ta’minotini uzib qo‘ygan va u yerga tibbiyot xodimlari yoki jurnalistlarning kirishiga ruxsat bermagan.
Falastin rahbariyati Jenindagi otishmadan keyin Isroil bilan xavfsizlikni muvofiqlashtirish rejimi toʻxtatilganini eʼlon qildi. Jerusalem Post Falastin shunga o‘xshash qarorni 2020-yilda ham e’lon qilgani, ammo besh oydan keyin undan voz kechganini yozdi.
Ayni paytda Falastin rahbariyati Birlashgan Millatlar Tashkiloti Xavfsizlik Kengashiga murojaat yo‘llashga qaror qilgan.
Ukrainaga jangovar samolyotlar yetkazib berilish shartlari aytildi
G‘arb davlatlari Kiyevga tanklar yetkazib berilishi haqida e’lon qilgach, Ukraina prezidenti g‘arbdan uzoq masofaga uchuvchi raketalar va jangovar samolyotlar olishni ham kutayotganini aytdi. Politico nashri xabar berishicha, G‘arb harbiy amaldorlari bu masalani muhokama qilmoqda.
Xususan, Parij Kiyevga qiruvchilar yetkazib berishni istisno qilmaydi, ammo bu harakat urushning kuchayishiga olib kelmasligi, shuningdek, Yevropa xususan, Fransiyaning xavfsizligiga zarar yetkazmasligi shart. Bu haqda Fransiya Milliy assambleyasining Milliy mudofaa va Qurolli kuchlar qo‘mitasi rahbari Tomas Gasillud ma’lum qildi.
“Har bir aniq vaziyat bo‘yicha so‘rovlarni ko‘rib chiqishimiz va barcha eshiklarni ochiq qoldirishimiz kerak. Buyog‘iga nima bo‘lishini yaqin haftalarda ko‘ramiz, chunki ishlar tez sur’atda davom etmoqda”, — deya tushuntirdi fransiyalik amaldor.
Shuningdek, u Fransiya Ukrainaga o‘zining Leclerc tanklarini yetkazib berishi dargumonligini ta’kidladi, chunki ular Kiyevga berilishi e’lon qilingan Amerika va Germaniya tanklari bilan “mos tushmaydi”.
O‘zbekiston—Qirg‘iziston hamkorligida qaysi yo‘nalishlarga alohida e’tibor qaratildi
Shavkat Mirziyoyev va Sadir Japarov tor doiradagi muzokaralarni ikki mamlakat rasmiy delegatsiyalari aʼzolari, qator vazirlik va viloyatlari rahbarlari ishtirokida kengaytirilgan tarkibda davom ettirib, hamkorlik yo‘nalishlarni belgiladi.
Muzokarada sanoat kooperatsiyasi doirasida qariyb 500 million dollarlik yangi investitsiya loyihalarini ishlab chiqish taklif qilindi. Avtomobillar, zamonaviy maishiy texnika, qurilish materiallarini ishlab chiqarish, foydali qazilmalarni birgalikda qazib olish va qayta ishlash shular jumlasidan.
Intensiv bogʻlar va issiqxona xoʻjaliklarini rivojlantirish, meva-sabzavot va chorvachilik mahsulotlarini yetkazish, yetishtirish kabi agrokooperatsiya dasturini amalga oshirish belgilandi.
Transport va logistika sohasida: Xitoy—Qirgʻiziston—Oʻzbekiston temir yoʻlini qurish ishlarini faollashtirish, Andijon—Oʻsh—Irkishtom avtomobil yoʻlini toʻliq ishga tushirish maqsadida qoʻshma transport-logistika kompaniyasini tashkil etishga kelishildi.
Muzokaralarda energetika sohasidagi hamkorlikka alohida eʼtibor qaratildi. Gidroenergetikadagi loyihalarni amalga oshirish, shu jumladan Qambarota GES-1 qurilishi borasida birgalikdagi saʼy-harakatlarni tezlashtirish zarurligi qayd etildi.
Izoh (0)