Avitaminoz: keksa yoshdagi insonlar sog‘lig‘ida kuzatiladigan muammolar sababi

Shifokor Ruslan Gnidenkoning aytishicha, keksa yoshdagi organizmda kuzatiladigan muammolarning sababi vitamin tanqisligi hisoblanadi. Vitamin va minerallarning yetishmasligi nafaqat noto‘g‘ri ovqatlanish, balki ba’zi dori-darmonlarni uzoq muddat davomida qabul qilish fonida ham paydo bo‘lishi mumkin. Masalan, og‘riq qoldiruvchi va trankvilizator (tinchlantiruvchi)larni qabul qilish C va B6, B12 vitaminining so‘rilishini kamaytiradi, deb yozadi “Noviy ochag”.

A vitamini

Uning yetishmovchiligi belgilari — charchoq, xira ko‘rish, soch to‘kilishi, zaif immunitet, quruq teri. Karam, sut, jigar, yog‘li baliq, tuxum sarig‘i, qizil va to‘q sariq rangli meva va sabzavotlarni iste’mol qilish orqali tanqislikni to‘ldirish mumkin.

B guruhi vitaminlari

Jahldorlik, surunkali charchoq, migren, soch to‘kilishi, terining rangsizligi, ishtahaning yomonligi, ich qotishi, ovqat hazm qilishning buzilishi vitamin yetishmasligidan dalolat beradi. Ushbu vitaminni go‘sht, yog‘li baliq, yong‘oq, yashil sabzavotlar, sut mahsulotlari, o‘simlik moylari va tuxum iste’mol qilish orqali olish mumkin. Shuningdek, spirtli ichimliklar, qahva, choyni iste’mol qilishni kamaytirish va chekishni butunlay tashlash kerak.

C vitamini

Burundan qon ketishi, tushkunlik, kamqonlik, immunitetning zaiflashishi, mushaklar og‘rig‘i, nafas qisilishi, tish emalining zaiflashishi organizmning ushbu vitaminga juda muhtojligidan dalolat beradi. Meva va sitruslarni iste’mol qilish, shuningdek, ratsionga iloji boricha ko‘proq yangi sabzavotlar va sutni kiritish kerak. Na’matak, tarvuz, smorodina va boshqa rezavorlar ham tanqislikni to‘ldirishga qodir.

PP vitamini

Uning yetishmovchiligi diareya, ko‘ngil aynishi, uyqusizlik, teri qurishi, bosh og‘rig‘i va aylanishi bilan kuzatiladi. 70 yoshdan oshgan keksa odamlar ratsioniga sitrus, ko‘katlar, uzum, o‘riklar, turli xil rezavorlar va qora shokoladni kiritishlari kerak.

D vitamini

Keksa yoshda D vitaminining yetishmovchiligi bosimning ko‘tarilishi, ortiqcha terlash, asabiylashish, kariyes, mushaklarda og‘riq va zaiflik bilan namoyon bo‘ladi. Buning uchun mol jigari, baliq va baliq yog‘i, sut mahsulotlari, tuxum sarig‘ini iste’mol qilish kerak. Bundan tashqari, iloji boricha tez-tez ochiq havoda yurish tavsiya etiladi.

E vitamini

Vitaminga bo‘lgan ehtiyojning asosiy belgilari — ko‘z ostida qora dog‘lar, mushaklarning kuchsizligi, terining pigmentatsiyasi, kayfiyatning o‘zgarishi, ko‘rishning xiralashishi. Urug‘, don, sut, jigar, mol go‘shti, no‘xat, dukkaklilardan foydalanish tavsiya etiladi.

K vitamini

Surunkali charchoq, burundan qon ketishi, anemiya, gematomalar ushbu vitamin yetishmovchiligi belgilaridir. Ushbu muhim vitaminni tuxum, loviya, go‘sht, parranda va sut mahsulotlari, shuningdek, yangi sabzavotlar va soyadan olish mumkin.

Keksa yoshdagilar vitaminlarni qanday qabul qilish kerak?

Vitaminlarni bemorning yoshi, umumiy ahvoli va shikoyatlarini hisobga olgan holda, faqat shifokor buyurishi kerak. Vitamin-mineral kompleksni tanlashda surunkali kasalliklar mavjudligini inobatga olish lozim. Bundan tashqari, bemor qanchalik keksa bo‘lsa, vitaminlarni tanlashga shunchalik ehtiyotkorlik bilan yondashish kerak. Keksalar, ayniqsa, 75 yoshdan oshganlar uchun gipervitaminoz ham vitamin va minerallarning yetishmasligidan kam xavfli emas. Ushbu moddalarni ortiqcha iste’mol qilish asab tizimining buzilishi va buyrada toshlar paydo bo‘lishiga olib kelishi mumkin.