Shavkat Mirziyoyev 24-yanvar kuni IHT Tashqi ishlar vazirlari kengashi tadbirlari doirasida Toshkent shahrida boʻlib turgan Turkmaniston tashqi ishlar vaziri Rashid Meredovni qabul qildi.
Vazir Rashid Meredov davlat rahbariga Turkmaniston prezidenti Serdar Berdimuhamedov va Xalq Maslahati raisi, Millat yetakchisi Gurbanguli Berdimuhamedovning samimiy salomi va ezgu tilaklarini yetkazdi.
Uchrashuvda 2022-yilning 14—15-iyul kunlaridagi Turkmaniston prezidentining Oʻzbekistonga davlat tashrifi va 21—22-oktabr kunlaridagi Oʻzbekiston prezidentining Turkmanistonga rasmiy tashrifi davomida erishilgan oliy darajadagi kelishuvlarni amalga oshirish jihatlari muhokama qilindi.
Oʻzbekiston—Turkmaniston strategik sheriklik munosabatlarini yanada chuqurlashtirish, iqtisodiyot, savdo, sanoat kooperatsiyasi, energetika, transport va logistika sohalaridagi hamkorlikni kengaytirish, hududlararo aloqalar va madaniy-gumanitar almashinuvni faollashtirish masalalari koʻrib chiqildi.
2023-yilning birinchi choragida qator qoʻshma tadbirlar — Hukumatlararo komissiya, Suv xoʻjaligi masalalari boʻyicha qoʻshma komissiyaning navbatdagi yigʻilishlari, tashqi ishlar vazirliklari oʻrtasidagi siyosiy maslahatlashuvlar, madaniy va boshqa tadbirlar oʻtkazilishi taʼkidlandi. Mintaqaviy va xalqaro ahamiyatga molik dolzarb masalalar yuzasidan ham fikr almashildi. Boʻlajak uchrashuvlar rejasi koʻrib chiqildi.
Izoh (0)