Самарқанд вилояти кардиология диспансери томонидан 9 январь куни муассасага 2 та ултратовушли асбоб сотиб олиш бўйича тендер эълон қилинганди. “Дарё” кузатувига кўра, тендерда иштирок этган иккита тадбиркорлик субъекти бир одамга тегишли экани маълум бўлган.
Коррупцияга қарши курашиш агентлиги мазкур мақола юзасидан муносабат билдирди. Аниқланишича, тиббиёт марказининг вилоят филиали харид комиссиясининг 2023 йил 17 январдаги баённомаси билан “Тиб Dunёси” МЧЖ танлаш ғолиби, “Турҳан Ислам” МЧЖ эса захирадаги ғолиб деб топилган.
Ўрганишда мазкур икки жамият бир шахсга тегишли эканлиги, бироқ харид комиссияси томонидан ўзаро аффилланган иштирокчилар харид жараёнидан четлатилмасдан “Давлат харидлари тўғрисида”ги қонуннинг 42-моддаси талаблари қўпол равишда бузилганлиги аниқланган.
Шу ва бошқа қонун бузилиши ҳолатлари юзасидан 17 январь куни (баённома тасдиқланган куннинг ўзида) Соғлиқни сақлаш вазирлигига ушбу танлаш юзасидан харид комиссияси баённомасини бекор қилиш юзасидан тақдимнома киритилган. Бундан ташқари, шу куннинг ўзида қонун бузилиши ҳолатларига ҳуқуқий баҳо бериш учун тўпланган ҳужжатлар Бош прокуратурага юборилган.
Изоҳ (0)