Ijtimoiy tarmoqlarda Sirdaryo viloyatida oʻtkaziladigan koʻpkari uchun Zomin qoʻriqxonasidan boʻri olib kelinishi haqida videoxabarlar tarqaldi. Ushbu xabarlar yuzasidan Sirdaryo va Jizzax viloyatlari Ekologiya hamda Ichki ishlar boshqarmalari xodimlari tomonidan oʻrganish ishlari olib borildi.
O‘rganish natijasida videotasvirdagi fuqarolardan biri Xovos tumanining “Istiqlol” MFYda yashovchi fuqaro Sh.R ekani aniqlandi. U koʻpkariga sovrin uchun boʻri qoʻyishni maqsad qilgani, videotasvirdagi holat Jizzax viloyatining Zomin tumanida tasvirga olingani va boʻri ushbu tumanda yashovchi fuqaro E.A ning uyida saqlanayotganini bildirgan.
Holat yuzasidan belgilangan tartibda hujjatlar rasmiylashtirilib, Jizzax viloyati Ekologiya va Ichki ishlar boshqarmalari xodimlariga tegishli maʼlumotlar taqdim qilingan.
Ushbu maʼlumotlarga asosan Zomin tumani Ekologiya boʻlimi va ichki ishlar xodimlari tomonidan olib borilgan oʻrganishlar davomida “Turkman” MFYda yashovchi K.Gʻ. ismli fuqaro oʻz xonadonida boʻrini noqonuniy tarzda tutqunlikda saqlab kelayotgani aniqlangan.
Ushbu fuqaro bu harakati bilan “Hayvonot dunyosini muhofaza qilish va undan foydalanish toʻgʻrisida”gi qonunning 4, 32, 33-moddalari talablarini buzgan. Shundan kelib chiqib, mazkur fuqaroga nisbatan Ma’muriy javobgarlik to‘g‘risidagi kodeksning 90-moddasi, 1-bandiga asosan BHMning 10 baravari, yaʼni 3 million soʻm miqdorida jarima belgilandi.
Davlat inspektorlari tomonidan boʻrining holati koʻzdan kechirilganda, jonivor sogʻlom ekani aniqlangan va u tabiat bagʻriga qoʻyib yuborilgan.
Izoh (0)