Xitoy kompaniyalari Rossiyaga xavfli bo‘lmagan harbiy buyumlar sotgan, rus armiyasi Ukrainadagi urushda undan foydalanmoqda. Bu haqda CNN telekanalining ikki manbasi xabar berdi.
AQSH prezidenti Jo Bayden ma’muriyati mazkur ma’lumotga egaligi va Pekinning harakatlaridan xavotirdaligi ma’lum qilindi. Xitoy o‘q o‘tkazmaydigan jilet va dubulg‘alarni sotgan, biroq Moskva jiddiyroq harbiy yordam so‘ragani aytilmoqda.
“Vashington Rossiyaga harbiy texnika yetkazib berilishidan xavotirda, biroq Xitoy hukumati bundan xabardormi yoki yo‘qmi, hozircha noma’lum. Davlat korxonalari Xitoy iqtisodiyotining asosini tashkil etadi, ammo hammasi ham doimiy nazorat ostida emas”, — deydi AQSH rasmiylaridan biri.
CNN’ning ikkinchi manbasiga ko‘ra, ba’zi AQSH rasmiylari Xitoy Rossiyaga harbiy buyumlar berayotganidan xabardor ekaniga ishonchi komil.
“Xitoy rasmiylari buni to‘xtatish uchun choralar ko‘rishi kerak”, — dedi manba.
Bayden ma’muriyati Pekinning Moskvani qo‘llab-quvvatlashi ahamiyatini o‘lchayotgani, bu AQSHning xavotirini kuchaytirayotgani ta’kidlanadi. CNN manbalari Bayden ma’muriyatining Pekin bilan aloqalari haqida batafsil ma’lumot bermagan.
“AQSH davlat kotibi Entoni Blinken yaqin haftalarda Xitoyga bormoqchi, unda Rossiyaga harbiy texnika yetkazib berish muhokama mavzusi bo‘ladi. Agar Bayden haqiqatan ham Rossiyaga Xitoy harbiy yordami yetkazilgani faktini aniqlasa, unga qanchalik qattiq javob berish kerakligini hal qilish kerak”, — deydi rasmiylar.
Ta’kidlanishicha, Rossiyaning Ukrainaga bostirib kirishining dastlabki kunida Baydenning yordamchilari Xitoyni Rossiyani qo‘llab-quvvatlash oqibatlari haqida ogohlantirgan.
“Xitoy Moskva so‘ragan moliyaviy va harbiy yordamning ko‘p qismini ko‘rsatmadi. Pekin Rossiyadan farqli o‘laroq, iqtisodiy jihatdan G‘arb bilan juda chambarchas bog‘langan. Xitoyliklar jahon hamjamiyatining g‘azabiga duch kelmaslikka intilmoqda”, — deydi AQSH razvedkasi.
Mavzuga doir: Xitoy amaldorlari Putinni “telba” deb atab, Rossiyadan uzoqlashishga chaqirmoqda
Izoh (0)