Ukraina prezidenti Vladimir Zelenskiy safarbarlik va harbiy holat paytida davlat xizmatchilariga mamlakat tashqarisiga faqat xizmat safari bilan chiqishga ruxsat beruvchi farmonni imzoladi.
Zelenskiy urushning 334-kuni yakunlari bo‘yicha yo‘llagan murojaatida farmon haqida shunday dedi:
“Milliy xavfsizlik va mudofaa kengashidagi mansabdor shaxslarning xorijga chiqishi masalasida fundamental qaror bor. Bu markaziy hokimiyatning barcha mansabdor shaxslariga, turli darajadagi mahalliy hokimiyat organlariga tegishli. Bu huquq-tartibot idoralari xodimlari, xalq deputatlari, prokurorlar va davlat uchun, davlatda turib ishlashi kerak bo‘lgan har bir kishiga taalluqlidir.
Hozir dam olish — davlat xizmatidan bo‘sh vaqtda dam olish bo‘ladi. Endi mansabdor shaxslar xorijga dam olish yoki boshqa nodavlat maqsadlarda chiqa olmaydi. Besh kun ichida Vazirlar Mahkamasi mansabdor shaxslarning chegaradan o‘tishiga oid shunday tartibini ishlab chiqishi kerak, shunda chegaradan o‘tishga faqat haqiqiy xizmat safari asos bo‘la oladi”.
Farmonga ko‘ra, mamlakatdan chiqishga taqiq Ukraina Vazirlar Mahkamasi aʼzolariga, prezident ofisi rahbariyati, Oliy Rada deputatlari, sudyalar, prokurorlar, Ukraina xavfsizlik xizmati rahbarlari, Markaziy saylov komissiyasi, Milliy xavfsizlik va mudofaa kengashi, Milliy bank rahbarlari, shahar maʼmuriyatlari rahbarlariga nisbatan qo‘llaniladi.
“Ukrainskaya pravda” 23-yanvar kuni Ukraina bosh prokurori o‘rinbosari Aleksiy Simonenko iste’foga chiqqani haqida xabar bergandi. Ma’lum bo‘lishicha, u lvovlik tadbirkor va deputat Grigoriy Kozlovskiyning mashinasidan foydalanib, oilasi bilan Ispaniyaga ta’tilga chiqib kelgan.
Izoh (0)