AQSH Janubiy Afrika respublikasining Rossiya va Xitoy bilan qo‘shma harbiy mashg‘ulotlarda ishtirok etish qaroridan xavotirda, dedi Oq uy matbuot kotibi Karin Jan-Pyer.
“AQSH, avval ham aytganimizdek, Rossiya Ukrainaga qarshi urush olib borayotgan bir paytda u bilan mashgʻulotlar oʻtkazadigan har qanday davlatdan xavotirda. Biz bu haqda doimiy ravishda gapirib kelamiz. Lekin, albatta, har bir davlat o‘zi qaror qabul qiladi. Ammo bizda yetarlicha xavotirlar bor”, — dedi Jan-Pyer.
19-yanvar kuni Janubiy Afrika respublikasi Mudofaa vazirligi va harbiy faxriylar Rossiya va Xitoy bilan mamlakat qirg‘oqlarida qo‘shma mashg‘ulotlar o‘tkazish rejalari haqida ma’lum qilgandi. Ular 17 — 27-fevralda Hind okeanida, Durban port shahri va Richards-Bey hududlarida o‘tkazilishi kerak. Vazirlik manyovrlarning maqsadini “operativ ko‘nikma va bilim almashish” deb atadi.
Yanvar oyi o‘rtasida Belarus hududida Rossiya va Belarusning mintaqaviy qo‘shin guruhlari tarkibiga kiruvchi harbiy aviatsiyasi bo‘linmalarining qo‘shma o‘quv mashqlari boshlangandi. Mashg‘ulotlar Belarus harbiy-havo kuchlari va havo hujumiga qarshi mudofaa qo‘shinlari aerodromlarida va poligonlarida 16-yanvardan 1-fevralga qadar bo‘lib o‘tadi. Rossiya tomonidan ushbu tadbirlarda mamlakat havo-kosmik kuchlari jangovar guruhlari qatnashmoqda.
Izoh (0)