Исроилда 100 мингдан ортиқ одам мамлакатнинг Бенямин Нетаньяху бошчилигида тузилган янги ҳукумати сиёсатига қарши норозилик намойишига чиқди.
21 январь, шанба куни, полиция ҳисоб-китобларига кўра, 110 мингга яқин одам Тель-Авив кўчаларига чиқди ва бу янги ҳукуматга қарши энг йирик норозилик намойишига айланди. Ташкилотчилар иштирокчилар сонини 150 минг киши деб баҳолаган. Мамлакатнинг турли шаҳарларида, жумладан, Қуддус, Ҳайфа, Беер-шеве, Герцлия ва Модинда ҳам минглаб одамлар намойишга чиқди, деб ёзади The Times of Israel. Бундай акциялар Исроилда кетма-кет учинчи шанба ўтказилмоқда.
Оломон қўлларида «Демократиянинг интиҳосини тўхтатинг» ёзуви туширилган баннерлар ва Нетаньяхунинг «жиноятчи» деб ёзилган суратларини кўтариб олган. Ташкилотчилар «янги ҳукуматнинг ислоҳотлар ниқоби остида Исроил демократиясини йўқ қилишга уринаётганидан» норози эканини айтган.
Халқ суд ислоҳотига қарши норозилик билдирмоқда
Декабрь ойи охирида Исроилда янги ҳукумат қасамёд қилган эди. Бир ярим йил мухолифатда бўлганидан сўнг бош вазирлик лавозимига қайтган Нетаньяху Вазирлар Маҳкамасининг 33 аъзосини таништирди, улар орасида ўнгчи националист диний коалициядан ҳам вакиллар бор.
Адлия вазирлиги раҳбари Ярив Левин томонидан таклиф қилинган суд-ҳуқуқ ислоҳоти янги Вазирлар Маҳкамасининг энг резонансли ташаббусларидан бири бўлди. Унинг фикрича, Олий суднинг ваколатлари қонунлар ва ҳукумат қарорлари билан чекланади, Вазирлар Маҳкамаси судьяларни танлаш устидан назоратни ҳам ўз қўлига олади. Шундай қилиб, бирор қонун ҳатто Олий суд томонидан мамлакат конституциясига зид деб топилса ҳам, парламент уни қабул қилиш имкониятига эга бўлади.
Изоҳ (0)