Biznes rahbarlari orasidagi ashaddiy mehnatkashlar soni bo‘yicha Fransiya birinchi o‘rinni egalladi, deb yozadi Bloomberg Bupa Global tibbiy sug‘urta kompaniyasi tadqiqotlariga tayanib.
Fransiyadagi biznes rahbarlarining o‘ntasidan to‘rt nafari uzoq vaqt davomida muntazam tanaffuslarsiz zo‘r berib ishlashini aytgan, bu esa dunyo bo‘yicha o‘rtacha ko‘rsatkichdan sezilarli darajada ortiqroq, deyiladi tadqiqotda.
Bundan tashqari, fransiyalik rahbarlar o‘z ishining natijalari yuzasidan eng ko‘p xavotir olgan. Tadqiqot mualliflari aniqlashicha, fransuzlarning o‘z tashkilotlari hozirgi iqtisodiy beqarorlikka dosh berish qobiliyati yuzasidan xavotirlari hamda masofadan ishlashni istamasligi ularning butun dunyo bo‘yicha o‘z hamkasblariga nisbatan mehnatsevarlikka ko‘proq moyilligiga sabab bo‘lgan.
“Tashqi iqtisodiy bosim va mas’uliyatni o‘z zimmasiga olishga moyillikning bunday uyg‘unligi fransiyalik rahbarlar eng mehnatsevar bo‘lib chiqishiga olib kelgan bo‘lishi mumkin”, — dedi Bupa Global boshqaruv direktori Entoni Kabrelli.
Mehnatsevarlar soni bo‘yicha reytingda ikkinchi o‘rinni BAA, uchinchi o‘rinni esa Misr egalladi. Ulardan keyinda Gonkong, Xitoy, Buyuk Britaniya, AQSH va Singapur joylashdi.
So‘rovnoma ma’lumotlariga ko‘ra, ashaddiy mehnatkashlik masofadan ishlaganlarga nisbatan, ofisda to‘liq ish kuni ishlagan rahbarlar orasida ko‘proq tarqalgan.
2017-yilda Fransiya “ishdan uzilish huquqi” haqidagi qonunni kuchga kiritgan birinchi Yevropa mamlakatiga aylangan edi, bu tashkilotlardan ma’lum bir soatlardan keyin ish joyida elektron pochta va qo‘ng‘iroqlarni taqiqlashni talab etadi.
Bupa Global so‘rovi o‘tgan yilning avgust va sentabr oylarida sakkizta hududdagi 2439 nafar respondentlar orasida o‘tkazilgan.
Izoh (0)