Peru poytaxti Limada 19-yanvar kuni tushdan keyin prezident Dina Boluartening iste’fosi, Kongressni tarqatib yuborish va muddatidan oldin saylovlar o‘tkazish talabi bilan namoyishlar bo‘lib o‘tdi. Avvaliga namoyishlar nisbatan tinch o‘tgan, ko‘zni yoshlatuvchi gaz ishlatgan politsiya bilan bir nechta to‘qnashuvlar kuzatilgan. Ammo quyosh botganidan keyin vaziyat keskinlashdi, to‘qnashuvlar ko‘paydi va tarixiy avliyo Martin maydoni yaqinidagi binolardan birida katta yong‘in sodir bo‘ldi.
Perudagi norozilik namoyishlari dekabr oyining birinchi yarmida, o‘sha paytdagi prezident Pedro Kastilyo uni korrupsiya ayblovlari tufayli ishdan bo‘shatmoqchi bo‘lgan parlament yig‘ilishi oldidan Kongressni tarqatib yuborgani va favqulodda holat e’lon qilganidan keyin boshlangan. Shunga qaramay, deputatlar davlat rahbariga impichment e’lon qilishdi. Keyinchalik Kastilyo isyonda ayblanib, hibsga olindi va 18 oyga qamaldi.
Davlat rahbari lavozimini vitse-prezident Dina Boluarte egalladi. U 2024-yilda muddatidan oldin saylovlar o‘tkazish hamda konstitutsiyaviy islohotlarni taklif qildi. Ammo uni hamma ham qo‘llab-quvvatlamadi.
Yanvar oyida mamlakatda Boluarte, bosh vazir Alberto Otarola, ichki ishlar vazirlari Viktor Roxas va mudofaa vaziri Xorxe Chavesga nisbatan tergov boshlandi. Ular namoyishchilarning o‘limi tufayli genotsidda ayblanmoqda. La Republica qayd etishicha, mitinglar qurbonlarining umumiy soni 40 nafarga yaqinlashgan.
Izoh (0)