Farg‘onada IIB xodimlarini haqorat qilgan mast fuqaro 15 sutkaga qamaldi

Farg‘onada jamoat tartibini buzib, IIB xodimlarini haqorat qilgan mast fuqaro 15 sutkaga qamaldi. Bu haqda viloyat IIB matbuot xizmati xabar berdi.

18-yanvar kuni fuqaro I.R. Farg‘ona shahar Islom Karimov nomli kichik halqa yo‘lida, yo‘lning qatnov qismida spirtli ichimlik iste’mol qilgan holda harakatlanib ketayotgan bo‘lgan. YPX inspektorlari fuqaroning xavfsizligini o‘ylagan holda, boshqa harakat ishtirokchilarining harakatiga xalaqit bermasligini talab qilgan.

Ammo fuqaro ichki ishlar organlari xodimlarining qonuniy talabini bajarmasdan, jamiyatda yurish-turish qoidalarini qasddan mensimasdan, jamoat tartibini buzib, uyatli so‘zlar bilan so‘kinib, baqir-chaqir qilib, fuqarolar tinchligini buzgan.

U Ma’muriy javobgarlik to‘g‘risidagi kodeksning 183 (mayda bezorilik) va 194-moddalarida (ichki ishlar organlari xodimining qonuniy talablarini bajarmaslik) nazarda tutilgan huquqbuzarliklar sodir etganlikda aybdor deb topildi.

Sud qaroriga asosan 15 sutka ma’muriy qamoq jazosi hamda BHMning 5 baravari (1,5 million so‘m) miqdoridagi jarima jazosi tayinlandi.