Davlat xavfsizlik xizmati va Ichki ishlar boshqarmalari hamkorlikda respublika bo‘ylab giyohvand modda savdosiga chek qo‘yish bo‘yicha tadbir o‘tkazdi. Unda Tojikistondan keltirilgan qariyb 5 kilogramm narkotik modda musodara qilindi.
Jumladan, Navoiy viloyati Karmana tumanida Spark to‘xtatib tekshirilganda, unda yo‘lovchi sifatida ketayotgan 1999-yilda tug‘ilgan, muqaddam sudlangan A.B.ning yonida 992 gramm gashish borligi aniqlanib, protsessual tartibda rasmiylashtirib olingan.
DXX va IIB xodimlari tomonidan olib borilgan surishtiruv harakatlari davomida u narkotik moddani Urgut tumanida istiqomat qiluvchi, 1996-yilda tug‘ilgan, muqaddam sudlangan T.M.dan sotib olganligi ma’lum bo‘lib, u ham qo‘lga olingan. O‘z navbatida ushbu narkosavdogar giyohvand moddani Samarqand shahrida yashovchi fuqarolardan xarid qilgani aniqlandi va uning ishtirokida nazorat ostida olish tezkor-qidiruv tadbiri o‘tkazilgan.
Jumladan, Samarqand shahrida yashovchi 1991-yilda tug‘ilgan muqaddam giyohvandlik vositalari bilan bog‘liq jinoyati uchun sudlangan ayol X.X. va uning turmush o‘rtog‘i, 1982-yilda tug‘ilgan X.F. 2 kilogramm 966 gramm gashish moddasini 21 ming dollarga sotayotgan vaqtlarida ushlangan. Bundan tashqari, tezkor tadbir davomida Bulung‘ur tumanida yashovchi, 1985-yilda tug‘ilgan X.M. ham 954 gramm opiy moddasini Samarqand shahrida sotayotgan vaqtida qo‘lga olingan.
Tekshiruvlar davomida ushbu giyohvandlik vositalari Tojikistondan kontrabanda yo‘li bilan keltirilgani aniqlangan. Holat yuzasidan Jinoyat kodeksining 273-moddasi (giyovandlik vositalari, ularning analoglari yoki psixotrop moddalarni o‘tkazish maqsadini ko‘zlab qonunga xilof ravishda tayyorlash, olish, saqlash va boshqa harakatlar qilish, shuningdek ularni qonunga xilof ravishda o‘tkazish) 5-qismi bilan jinoyat ishi qo‘zg‘atilib, tergov harakatlari olib borilmoqda.
Izoh (0)