O‘zbekiston hamkori: Hashamatdan holi, dunyoda top o‘nlikda, Osiyoda birinchi Li Kuan Yu maktabi (foto)
Ma’lumki, O‘zbekiston prezidenti Shavkat Mirziyoyev 17-yanvar kuni Singapurga davlat tashrifi doirasida Singapur milliy universiteti (SMU) huzuridagi Li Kuan Yu nomidagi Davlat siyosati maktabiga tashrif buyurdi.
Singapurning birinchi Bosh vaziri va ushbu mamlakat “iqtisodiy mo‘jizasi” muallifi Li Kuan Yu sharafiga nomlangan maktab davlat siyosati va xalqaro munosabatlar sohasida magistratura dasturlari asosida kadrlar tayyorlashga, ilmiy va siyosiy tadqiqotlar o‘tkazishga ixtisoslashgan. Bu yerda xorijiy mamlakatlarning yuqori darajadagi mansabdor shaxslarini o‘qitish uchun qisqa muddatli dasturlar ham tashkil etilgan.
Prezident tashrifi doirasida O‘zbekiston Davlat boshqaruvi akademiyasi va Li Kuan Yu nomidagi Davlat siyosati maktabi o‘rtasida hamkorlik to‘g‘risida bitim imzolash marosimi bo‘ldi. Akademiya rektori Adham Bekmurodov hamkorlik haqida fikrlarini bildirib o‘tdi.
Singapur milliy universiteti dunyo reytingida kuchli yigirmatalikda tursa, uning qoshidagi Li Kuan Yu nomidagi Davlat siyosati maktabi esa dunyodagi eng kuchli shu turdagi maktablar top o‘nligidan joy olgan.Oldimizda eng ilg‘or mamlakatlar tajribasini tatbiq etish kabi vazifa turibdi. Bunda nafaqat bilim va ko‘nikmalarni o‘zimizda joriy etish, balki aholiga eng sifatli, eng qulay davlat xizmati taklif etilayotgan, korrupsiya darajasi maksimal past samarali davlat siyosati tajribasi muvaffaqiyatli qo‘llab kelinayotgan muhitni bevosita o‘rganish talab etiladi.
Prezidentimiz raisligida 2022-yilning 4-avgust kuni o‘tkazilgan davlat xizmatini isloh qilish bo‘yicha videoselektor yig‘ilishida oldimizga aynan shu sohada eng ilg‘or mamlakatlar tajribasini o‘rganib, ularning ta’lim dasturlari asosida bilim olishni o‘zimizda tatbiq etish vazifa qilib qo‘yilgan edi. Li Kuan Yu maktabi esa Osiyoda birinchi, jahonda kuchli o‘ntalikda turadigan eng yetuk ta’lim dasturlariga ega ana shunday maktab. Agar ularning tajribasini o‘rganib, qo‘llay olsak, ayni yo‘nalishlarda yaqin yillar ichida jiddiy siljishga erishishimiz mumkin.
Tashrif doirasida hamkorlikning 2 ta yo‘nalishini ishlab chiqdik. Birinchi yo‘nalish aynan Li Kuan Yu maktabi tajribasi asosida o‘quv dasturlarimizni rivojlantirish, ya’ni magistratura va doktorlik ishlari, eng yuqori lavozimdagi rahbarlarni tayyorlashda eng jiddiy hamda uzoq muddatli tayyorgarlik dasturlaridan iborat. Ikkinchidan, amaldagi davlat xizmatchilarining ko‘nikmalari, professional kompetensiyalarini rivojlantirishga imkon beruvchi hamkorlik yo‘nalishida Singapur Vazirlar Mahkamasi huzuridagi Singapur davlat xizmati kolleji bilan hamkorlik qilamiz.
Nafaqat o‘quv, ya’ni nazariy jihatdan, balki amaliy tomondan ham natijalarga erishish uchun aynan shu 2 yo‘nalishni qamrab olyapmiz. Biri bir necha yil davomida natija berib borsa, boshqasi bir necha oy ichida ko‘zga tashlanishni boshlashi kerak.
Adham Bekmurodov, O‘zbekiston Davlat boshqaruvi akademiyasi rektori
Ma’lumot uchun, Li Kuan Yu nomidagi Davlat siyosati maktabi 2004-yil 4-avgustdan faoliyat olib borayotgan bo‘lib, SMU va Garvard universiteti qoshidagi Jon Kennedi maktabi hamkorligida 1992-yilda ishlab chiqilgan dasturni o‘zida tatbiq etgan.
2022-yildagi statistikaga ko‘ra, dunyoning 90 dan ortiq davlatidan kelgan 3500 nafar bitiruvchiga ega, 80 foiz tinglovchilari xorijliklardan iborat. Maktab davlat siyosati, davlat boshqaruvi va xalqaro tadqiqotlar maktablari guruhi bo‘lgan Xalqaro munosabatlar professional maktablari uyushmasi (APSIA) a’zosi. Kelgusidagi 10-15 yilda Osiyo mamlakatlari davlat siyosatida muhim bo‘lishi kutilayotgan 4 yo‘nalish: ijtimoiy siyosat, xalqaro munosabatlar va global boshqaruv, iqtisodiy rivojlanish va raqobatbardoshlik sohalarida o‘quv dasturlarning ulkan tajribasiga ega.
Bugungi kunda Davlat siyosati maktabi beshta magistratura dasturini, xususan, davlat siyosati va xalqaro munosabatlar, shuningdek, ilmiy stipendiya dasturlari, doktoranturani taklif etadi va to‘rtta tadqiqot markaziga ega:
- Osiyo raqobatbardoshlik instituti;
- Osiyo tadqiqotlari va globallashuv markazi;
- Siyosiy tadqiqotlar instituti;
- Suv siyosati instituti.
